Aqtóbede Májilistiń tuńǵysh tóraǵasy Marat Ospanovqa arnalǵan konferentsııa ótti
AQTÓBE. QazAqparat - Memleket jáne qoǵam qaıratkeri, Parlament Májilisiniń tuńǵysh tóraǵasy, Marat Ospanovtyń 70 jyldyq mereıtoıyna arnalǵan konferentsııa ótti, dep habarlaıdy QazAqparat tilshisi.
Apta boıy Marat Ospanov atyndaǵy Batys Qazaqstan memlekettik medıtsınalyq ýnıversıtetinde qoǵam qaıratkeriniń 70 jyldyǵyna arnalǵan túrli shara uıymdastyryldy.
Aldymen «Marat Ospanov – kórnekti memleket jáne qoǵam qaıratkeri, reformator, ǵalym-ekonomıst»taqyrybynda stýdenttermen kýratorlyq saǵattar uıymdastyrylyp, «Adam jáne qoǵam» zııatkerlik olımpıadasy boldy. Shaǵyn fýtboldan týrnır, «Ómir - bir sát» atty professor-oqytýshylar quramy men stýdentterdiń Marat Ospanov atyndaǵy qoǵamdyq qordyń jetekshisi Baqyt Ospanovamen kezdesýi ótti. Búgingi Aqtóbedegi konferentsııaǵa QR Parlamenti Májilisiniń áleýmettik-mádenı damý komıtetiniń tóraǵasy Gúlshara Ábdiqalyqova, Májilisiniń depýtaty Quralaı Qaraken, Marat Ospanov atyndaǵy qamqorshylyq keńesiniń tóraǵasy Rústem Qaıdarov jáne Marat Ospanovtyń jubaıy Baqyt Ospanova men uly Arsen Maratuly qatysty.
«Táýelsiz Qazaqstan tarıhynda eldiń ósip-órkendeýine, egemen memleket retinde aıaǵynan tik turýyna zor úles qosqan jandar az emes. Taǵdyrdyń jazýymen solardyń birazy bizdiń ortamyzda joq. «Jaqsynyń aty, ǵalymnyń haty ólmeıdi» degendeı, artynda óshpes iz qaldyrǵan azamattar az emes. Solardyń ishinde ǵalym, memleket jáne qoǵam qaıratkeri Marat Ospanovtyń orny aıryqsha. Biz ony respýblıkanyń Joǵarǵy keńes tóraǵasynyń orynbasary, QR birinshi shaqyrylymyndaǵy Parlamenti Májilisiniń tóraǵasy retinde el damýyna úles qosqan zor tulǵa dep tanımyz», - dedi oblys ákimi Ońdasyn Orazalın. M. Ospanov atyndaǵy qamqorshylyq keńestiń prezıdenti Baqyt Ospanova oblys ákimine jáne kelgen qonaqtarǵa akademıktiń ómiri men eńbegi baıandalǵan «Men senemin» atty kitabyn syılady.
«Marat Ospanov elimiz táýelsizdik alǵan kúnnen bastap Elbasy Nursultan Nazarbaevtyń senimdi serikteriniń biri bolǵan iri saıası tulǵa. Egemendikke jol ashqan Qazaqstan Respýblıkasynyń táýelsizdigi týraly dekloratsııasynan bastalatyn el úshin mańyzdy qujattar ázirleýge qatysqan qaıratker. Ol eldiń muńy men muqtajyn qorǵaýǵa baǵyttalǵan zańdardyń ázirlenýine barlyq bilimi men kúsh jigerin jumsaı bildi. Asyl qasıetterge ıe zııaly, parasatty tulǵa Marat Ospanovtyń asqan aqylynyń arqasynda Májilistegi qyzý pikirsaıystardyń ortaq sheshimi tabylyp, daǵdarysqa jol berilmeıtin», - dep eske aldy Parlament Májilisiniń áleýmettik-mádenı damý komıtetiniń tóraǵasy Gúlshara Ábdiqalyqova.
