Aqtóbede Májilis pen máslıhat depýtattyǵyna 45 adam ótinish berdi
«Májilis, barlyq deńgeıdegi máslıhat depýtattyǵyna óz-ózin usynýshylar ótinish berip jatyr. Qazir barlyq komıssııa músheleri tańǵy 9:00-den 18:00-ge deıin tirkeý júrgizedi. Jalpy oblys boıynsha 205 mandat bar. Buryn 202 mandat boldy. Bul joly oblystyq máslıhatqa eki, qalalyq máslıhatqa bir mandat qosyldy. Sóıtip 34-i oblystyq máslıhatta bolady. Onyń 50% partııalyq tizimmen, qalǵan 17-i saılaý okrýgi arqyly saılanady. Onyń 10-y Aqtóbe qalasynda, qalǵandary aýdandarda. Al qala men aýdandarda barlyq depýtat bir mandattyq júıe arqyly saılanady»,-dedi oblystyq aýmaqtyq saılaý komıssııasynyń tóraǵasy Nurlybek Júsipov.
Májiliske qatysty Aqtóbe oblysynda №10 okrýgtik saılaý komıssııasynyń quramy bekitildi. Talap boıynsha Májiliske 70% partııalyq tizim, qalǵany bir mandattyq júıemen saılanady. Munda oblysqa 5 oryn berilgen. Onyń tórteýi partııalyq tizim arqyly, bireýi bir mandattyq júıemen saılanady.
«Bir saılaýshy qolyna bes bıýlleten alady. Onyń ekeýi Májilis, úsheýi túrli deńgeıdegi máslıhat depýtatyn tańdaýǵa múmkindik beredi. Bir mandattyq júıege partııa, qoǵamdyq uıymdar da kandıdatyn usyna alady. Qoǵamdyq uıymdardyń jarǵysynda bári anyq kórsetilýi kerek. Májiliske 25 jasqa tolǵan, sońǵy 10 jylda Qazaqstanda turǵan adam ótinim bere alady. Al máslıhatqa úmitker bolǵysy keletin adamnyń jasy 20-ǵa tolǵan bolýy kerek. Áýeli saılaý okrýgin tańdaıdy. Úlgige saı ótinish berip, ómirbaıanyn jazady. Jeke kýáliginiń kóshirmesin qosa tapsyrady. Keıin qujattary tekseriledi. Sottalǵan, jazasyn ótip júrgen adamdar, sybaılas jemqorlyq zańnamasyn buzǵandar tirkelmeıdi»,- dedi Nurlybek Júsipov.
