Aqtóbede maıly daqyldardy jınaý jumysy qazanda aıaqtalady
AQTÓBE. QazAqparat - Aqtóbede dándi daqyldar jınaldy. Bıyl sharýalar ár gektarynan 13 tsentner ónim aldy. Maıly daqyldardy jınaý 20 qazanda aıaqtalady, dep habarlaıdy QazAqparat tilshisi.
Aqtóbede egis alqaby bıyl 656 myń gektarǵa jetti. Sońǵy úsh jylda óńirde egis alqaby 30 paıyzǵa artyp otyr. Basym bóligi dándi daqyl, al 41 myń ga - maıly daqyl.
«Aqtóbede egin jınaý jumysy aıaqtaldy. Barlyǵy 390 myń gektarǵa jýyq alqap túgel shabylyp, sharýalar ár gektarynan 12 tsentner astyq jınady. Aldyn ala esep boıynsha 505 myń tonna astyq qambaǵa quıyldy. Aýa raıy qolaıly bolsa, 20 qazanǵa deıin maıly daqyldy orý jumysy aıaqtalady. Kúzgi dalalyq jumystaryna 9,9 myń tonna dızel otyny bólindi. Baǵa respýblıkalyq kórsetkishten tómen», - dedi Aqtóbe oblysy aýyl sharýashylyǵy basqarmasynyń basshysy Qusaıyn Sarsembaı.
Aqtóbedegi aýyl sharýashylyǵynyń 8 aılyq kórsetkishi qorytylanǵan baspasóz máslıhatynda shalǵaıdaǵy sharýalardyń ınfraqurylymy aıtyldy. Máselen, bıyl jaıylymdardy ıgerý maqsatynda 72 uńǵyma qudyq qazý josparlanǵan. Onyń 50-i qazyldy. Sonymen qatar, 200-ge jýyq sharýa kún sáýlesi men jelden qýat alatyn balamaly ádisti paıdalanyp otyr.
«Óńirde dástúrli emes sharýashylyq damyp keledi. Aqtóbede bal arasyna arnalǵan oblystyq baǵdarlama qabyldandy. Qazirgi kezde ónim óndirý 10-15 paıyzǵa ósti. Máselen, eshki sútiniń lıtrine 60 teńge, bal arasynyń selektsııalyq jumystaryn júrgizý úshin ár uıasyna 20 myń teńge, bódene jumyrtqasyn ótkizgen kezde 3 teńge sýbsıdııa qarastyrylǵan. Qazir óńirde dástúrli emes sharýashylyq sany 1 myńǵa jýyqtady»,- dedi Qusaıyn Sarsembaı.
