Aqtóbede maıly daqyl men mal azyǵy alqabynyń kólemi artady

AQTÓBE. KAZINFORM – Aqtóbede byltyrǵa qaraǵanda bıyl egin alqabynyń kólemi 70 myń gektarǵa artady. Ásirese maıly daqyl men mal azyǵy alqaby ósti.

Bıyl Aqtóbede 806 myń gektar alqapta kóktemgi dalalyq jumys júrgiziledi. Onyń 458 myń ga dándi daqyl, 67 myń ga maıly daqyl, 274 myń ga mal egiledi. Sonymen birge 3,5 myń ga kartop, 2,5 myń ga ózge kókónis ósiriledi.

- Bıyl 45 myń tonna tuqym jınaldy. Tuqymdy tekserý jumysy júrip jatyr. Kóktemgi dalalyq jumystarǵa 1500 traktor, 1400 jer óńdeý agregaty, 100-den astam egis kesheni jumyldyrylady. Qazirgi ýaqytta tehnıka daıyndaý jumysy jalǵasyp jatyr. Óńirge 6,2 myń tonna dızel otyny bólindi. Bári sharýalarǵa beriledi. Baǵa naryqtan 15-20 paıyzǵa arzan. Tipti ósimdik sharýashylyǵyn sýbsıdııalaýǵa 1,2 mlrd teńge sýbsıdııa bólindi. Bul tuqym, mıneraldy tyńaıtqysh, pestıtsıdterdiń qunyn arzandatýǵa septigin tıgizedi, - dedi Aqtóbe oblystyq aýyl sharýashylyǵy basqarmasy eginshilik bóliminiń basshysy Nurbek Raıymbaev.

Sonymen birge Agrarlyq nesıe korporatsııasy men «Aqtóbe» ÁKK-y «Keń dala -2» baǵdarlamasy aıasynda ústemaqysy 5 paıyz bolatyn nesıe berip jatyr. Búginde 4,5 mlrd teńgeniń ótinimi maquldandy. Onyń 2,5 mlrd teńgesi sharýalarǵa berildi.

Aıta keteıik, Aqtóbede 500-den astam sharýashylyq egis jumystarymen aınalysady. Dalalyq jumys mamyr aıynda bastalady. Áıteke bı, Hromtaý, Qarǵaly men Mártók – egisti aýdandar.

- Bıyl egis alqabynyń, sonyń ishinde maıly daqyl men mal azyǵynyń alqaby artady. Maıly daqyl maı zaýytyn qajetti shıkizatpen qamtamasyz etýge kerek. Mal basy artqan soń mal azyǵyna da suranys ósip otyr. Bir jyldyq jáne kópjyldyq sýdan, erkekshóp ósiriledi. Kóktemgi dalalyq jumystary mamyr aıynda bastaldy. Ázirge jer ylǵal, tehnıka júrýge kelmeıdi,- dedi Nurbek Raıymbaev.

Eske salsaq, bıyl elimizde bıdaı alqaby 187 myń gektarǵa qysqartylady, esesine maıly daqyldar ulǵaıtylady. Bul týraly Aýyl sharýashylyǵy vıtse-mınıstri Erbol Tasjúrekov aıtty.