Aqtóbede máıittik donorǵa qatysty sot otyrysyna din ókilderi shaqyryldy
AQTÓBE. QazAqparat - Aqtóbede Serikbolsyn Kósherbaıdyń qos búıregin alý deregine qatysty sot otyrysyna din ókilderi shaqyryldy, dep habarlaıdy QazAqparat tilshisi.
Aqtóbe qalalyq sotynda Serikbolsyn Kósherbaıdyń qos búıregin alý deregine qatysty azamattyq is qaralyp jatyr. Marqumnyń qaryndasy Baldáýren Nurlybaevanyń qorǵaýshysy Qatarbaı Raısov sot otyrysyna din ókilderin qatystyrý týraly ótinish túsirdi.
«Meniń qorǵaýymdaǵy adamdar Islam dinin ustanady. Olar Serikbolsyn Kósherbaıdyń búıregin alǵanyna qarsy, ruqsat bermegen. Basylymǵa «ruqsat aldyq» dep jazyp, halyq arasynda abyroı-bedelimiz túsirdi dep esepteıdi. Bir aıǵa jýyq ýaqyt ótti. Basylym qateligin moıyndap, túsinikteme berip, aqparattyń jalǵan ekenin jarııalaǵan joq. Biz dáriger Erlan Sultangereevtiń basylym arqyly keshirim suraýyn talap etemiz», - dedi qorǵaýshy Q.Raısov.
Aıta keteıik, máıittik donor boıynsha azamattyq is №2 qalalyq sotta qarala bastady. https://kaz.inform.kz/news/22-zhastagy-zhigittin-buyregin-ruksatsyz-algan-darigerler-sotka-kelmedi_a3037870 Keıin respýblıkalyq transplantologııa ortalyǵynyń dırektory Jaqsylyq Dosqalıev Aqtóbege kelip, mıy ólgen adamnyń dene múshelerin naýqastarǵa salý úshin eshkimnen ruqsat suramaıtyndaryn málimdedi. Zań boıynsha adam tiri kezinde «donor bolýǵa qarsymyn» dep aryz jazbasa, mıy ólgen jaǵdaıda dáriger jedel sheshim qabyldaýǵa quqyly eken. Keıin Jaqsylyq Dosqalıev Serikbolsyn Kósherbaı eki adamnyń ómirin qutqarǵanyn, ózi kóńil aıtýǵa barýǵa daıyn ekenin jetkizgen bolatyn. Marqumnyń qaryndasy Baldáýren Nurlybaevanyń aıtýynsha, elimizdiń bas transplantologi J. Dosqalıev marqum Serikbolsyn Kósherbaıdyń otbasyna barmaǵan.
