Aqtóbede maıdangerlerdiń urpaqtary eskertkish aldyna jınaldy
AQTÓBE. KAZINFORM – Aqtóbede Jeńis kúni Máńgilik alaý, Álııa eskertkishteri men Batyrlar alańyna turǵyndar jınalyp, Ekinshi dúnıejúzilik soǵys kezinde qaza bolǵan maıdangerlerdi eske aldy. Arasynda Keńes Odaǵy batyrlarynyń urpaqtary da bar.
Jeńis kúni Aqtóbe qalasyndaǵy birneshe alańda gúl qoıý rásimi ótti. Turǵyndardyń keıbiri atasy men ákesin eske alyp, estelikterimen bólisti.
- Sheshemniń ákesi Keskibaı Aıdarbekovtyń fotosyn ákeldim. Ol Fın soǵysyna qatysyp, keıin Ekinshi dúnıejúzilik soǵysqa attanǵan. Voronej maıdanynda qaza bolǵan. Іzdep, taptym. Endi qaı jerde jerlengeni týraly hatty kútip otyrmyn. Ózi muǵalim bolǵan eken. Sonymen birge ákemniń aǵasy Bekturǵan Bekqulov Stalıngrad maıdanynda joǵalyp ketti. Esh aqparat tappadym. Esikbaı Aıdarbekov - naǵashy atamnyń aǵasy. 1942 Kalının maıdanynda qaza boldy. Bul kisi týraly aqparatty arhıvten izdep, taptym. Al ákem Bekbergenov Bekqulov soǵysqa shaqyrylǵanymen, urys dalasyna kirmeı turyp Jeńisti kórdi. Biraq uzaq ýaqyt áskerde bolǵan. Men osy adamdardyń fotosyn alyp, Álııa eskertkishi aldyna keldim,- dedi Árip Bekqulov.
Sonymen birge oqýshylar Batyrlar alańyndaǵy ár músinniń janynda kezekshilik qurdy. Munda batyrdyń urpaqtary jınalyp, ákesin eske aldy.
- Jyl saıyn ákem, Keńes Odaǵynyń batyry Qojabaı Jazyqovtyń urpaqtary Batyrlar alańyna jınalamyz. Munda ákemniń músini somdalǵan taqta bar. Jalpy onyń týǵan jerinde mektepke aty berildi. Kóshe ataýy da bar. Sonymen birge Baıǵanın aýdanynda eskertkishi qoıylǵan. Sonymen birge Mańǵystaýda keme ataýy bar dep estidim. Ózim jazýshy Ábish Kekilbaevtyń kómegimen kitap shyǵardym. Estelikter jınalyp, 2000 jyly jaryq kórdi,- dedi Qojabaı Jazyqtyń balasy Balǵaly Jazyqov.
Aıtyp óteıik, Qojabaı Jazyqov Ekinshi dúnıejúzilik soǵysta barlaýshy boldy. Ol 1942 jyly ásker qataryna shaqyrylyp, maıdan dalasynda talaı erlik kórsetti. Áskerıler men ofıtserlerdi qolǵa túsirip, 1945 jyly sáýirde Keńes Odaǵynyń batyry atandy. Soǵys bitken soń bilim alyp, tarıh páninen sabaq bergen.
Eske salsaq, Aqtóbe oblysy boıynsha 122 myńnan astam adam soǵysqa shaqyryldy. 35 aqtóbelik Keńes Odaǵynyń batyry. 9-y «Dańq» ordeniniń tolyq ıegeri atandy.