Aqtóbede maıdangerler men tyl eńbekkerlerine bir rettik tólem aýdaryldy

AQTÓBE. QazAqparat - Aqtóbede 29 soǵys ardageriniń árqaısysyna 1 mıllıon teńgeden berildi. Tyl eńbekkerleri men soǵys ardagerleriniń jesirlerine de bir rettik kómek aýdaryldy, dep habarlaıdy QazAqparat tilshisi oblys ákiminiń baspasóz qyzmetine silteme jasap.

Aqtóbe oblysynyń ákimi Ońdasyn Orazalın soǵys ardagerleri Nıkolaı Paşenko, Najımedın Amanbaev, Mıhaıl Dıdenkonyń shańyraǵynda boldy. Aqsaqaldardy Jeńistiń 75 jyldyǵymen arnaıy quttyqtap, Prezıdent Qasym-Jomart Toqaevtyń sálemdemesin jetkizdi. Aqtóbe ferroqorytpa zaýytynyń ardageri Nıkolaı Paşenkonyń jeke óz qurmetine úıiniń aýlasynda Jeńis sherýi uıymdastyryldy. Áskerı orkestr «Jeńis kúni» ánin súıemeldep, 66/55 áskerı bóliminiń sarbazdary sap túzep, soǵys ardagerine sálem berdi. Qarııa qurmetine arnalǵan sherýdi páteriniń terezesinen tamashalady.
«Óńirde turatyn 6795 soǵys jáne eńbek ardagerine oblystyq bıýdjetten 341 mln teńge kómek berilgen. 29 maıdangerdiń árqaısysyna 1 mln teńgeden, 1777 soǵys ardagerlerine teńestirilgenderge 100 myń, 222 soǵys ardageriniń jesirine 50 myń, 4988 tyl ardagerine 30 myń teńgeden tabystaldy», - dep habarlady oblys ákiminiń baspasóz qyzmeti.