Aqtóbede máslıhat tóraǵasy jumystan zańsyz shyǵarylǵanyn sot arqyly dáleldedi

AQTÓBE. KAZINFORM — Marǵulan Serjan kezekti eńbek demalysyna shyǵyp, qyzmetine qaıta orala almaı qaldy. Jumystan zańsyz shyǵarylǵanyn sot arqyly dáleldegen Baıǵanın aýdandyq máslıhatynyń tóraǵasy qyzmetine qaıta kirisedi.

Іs Baıǵanın aýdandyq sotynda qaraldy. Talap qoıýshy Baıǵanın aýdandyq máslıhatynyń burynǵy tóraǵasy Serjan Marǵulan, al jaýapker aýdandyq máslıhatynyń apparaty. Sonymen birge máslıhat depýtattary úshinshi tulǵa retinde sot otyrysyna qatysty. Talap qoıýshy ózin jumystan shyǵarý týraly sheshimdi zańsyz dep tanýdy, qyzmetine qaıta ornalastyrýdy, osy ýaqyt aralyǵynda tabysynan aıyrylǵanyn, sondyqtan eńbekaqysyn tolyq kólemde óteýdi surady. 

— Marǵulan Serjannyń talaby qanaǵattandyrylsyn. Aqtóbe oblysy Baıǵanın aýdandyq máslıhatynyń Marǵulan Serjanuly Serjandy máslıhat tóraǵasy qyzmetinen bosatý týraly sheshimi zańsyz dep tanylsyn. Aqtóbe oblysy Baıǵanın aýdandyq máslıhat tóraǵasy laýazymy qaıta qalpyna keltirilsin. «Baıǵanın aýdandyq máslıhatynyń apparaty» memlekettik mekemesinen Marǵulan Serjanuly Serjannyń paıdasyna 2025 jylǵy 2 maýsymnan bastap laýazymy qalpyna keltirilgen kúnge deıin, biraq alty aıdan aspaıtyn ýaqytqa ortasha aılyq jalaqysy eseptelip, óndirilsin. Sot sheshiminiń jumysqa qaıta ornalastyrý jáne lajsyz bos júrgen kúnderiniń úsh aıdan aspaıtyn jalaqysy, ıaǵnı 1 708 676 teńge óndirý bóligi dereý oryndaýǵa joldansyn, — dedi sýdıa N.Alımbekov.

Taraptar Aqtóbe oblystyq sotynyń azamattyq ister jónindegi sot alqasyna apellıatsııalyq shaǵym bere alady. 

Eske salsaq, Shalqar aýdandyq sáýlet, qurylys jáne qala qurylysy bóliminiń basshysy Shuǵa Sádýaqasova para alǵany úshin 7 jylǵa bas bostandyǵynan aıyryldy. Sýdıa Aqtóbe oblysy ákimine jeke qaýly shyǵardy.