Aqtóbede máslıhat depýtaty shyn máninde joq malǵa zańsyz sýbsıdııa alǵan

AQTÓBE. QazAqparat - Aqtóbe oblysynda aýdandyq máslıhat depýtaty shyn máninde joq malǵa zańsyz sýbsıdııa alǵan, dep habarlaıdy QazAqparat.

Іri kólemde jasalǵan alaıaqtyq faktisi boıynsha aýdandyq máslıhat depýtatyna qatysty Qarjylyq monıtorıng agenttigi Aqtóbe oblystyq departamenti sotqa deıingi tergeý amaldaryn júrgizip jatyr.

«Sharýa qojalyǵy atynan shyn máninde joq bolǵan malǵa sýbsıdııa alýǵa ótinish bergen. Sondaı-aq, bul azamat «Sybaǵa» memlekettik baǵdarlamasy boıynsha «Agrarlyq nesıe korporatsııasy» AQ 600 bas iri qara mal satyp alýǵa bergen nesıe qarajatyn zańsyz alǵan.

Osylaısha, jalpy shyǵyn kólemi 457 mıllıon teńgeni quraıdy. Qazirgi ýaqytta bul azamat ustalyp, oǵan qatysty «qamaý» túrindegi bultartpaý sharasy taǵaıyndaldy», - dep jazdy vedomstvodan.