Aqtóbede máslıhat depýtaty áıeldi uryp-soqty degen kúdikke ilikti
AQTÓBE. KAZINFORM – Aqtóbe oblysy Baıǵanın aýdandyq máslıhat depýtaty Bolat Aıap áıeldi uryp-soqty degen kúdikke ilikti. Qazir tergeý júrip jatyr.
Aqtóbede Jarly aýylynyń turǵyny Kúnsulý Namazbaeva áleýmettik jeli arqyly ózin Bolat Aıap urǵanyn, ómirine qaýip tóngenin aıtyp, kómek surady.
Habarlamadan soń polıtsııa tergeýdi bastady.
- Atalǵan derek boıynsha Baıǵanın aýdany polıtsııa bólimi Qylmystyq kodekstiń «Uryp-soǵý» baby boıynsha is qozǵady. Tergeý júrip jatyr, - dep habarlady Aqtóbe oblystyq PD baspasóz qyzmeti.
Baıǵanın aýdandyq máslıhatynyń tóraǵasy Marǵulan Serjannyń aıtýynsha, Bolat Aıap №6 saılaý okrýginiń depýtaty.
- Depýtat etıkasy jónindegi turaqty komıssııa bar. Biraq oǵan ázirge mundaı másele túsken joq. Bul oqıǵaǵa qatysty polıtsııaǵa aryz túskeni ras. Polıtsııa aq-qarasyn shyǵarady. Kináli dep tanylsa, qaralady. Jalpy osyǵan deıin ózge depýtatqa qatysty shaǵym tústi. Taraptar tatýlasqan soń turaqty komıssııada qaralmady, - dedi Marǵulan Serjan.
Kúdikke ilikken depýtat Bolat Aıap qazir tergeý jumystary júrip jatqanyn, óziniń qorǵaýshy jaldaǵanyn aıtty.
- Tergeý júrip jatqan soń eshteńe aıta almaımyn. Búgin túske deıin tergeýde boldym. Qazir qan qysymym kóterilip, aýyryp otyrmyn. Jalǵan dúnıe ekeni kóriner. Advokat jaldadym, - dedi Bolat Aıap.
Eske salsaq, eki jyl buryn Aqtóbede qalalyq máslıhat depýtaty rýlge mas kúıinde otyryp, 15 táýlikke qamaldy. Keıin ol qoǵamdyq keńs múshesi boldy.