Aqtóbede maskúnemder jıi jınalatyn úıler anyqtaldy
AQTÓBE. KAZINFORM – Qala men aýdandarda mundaı 62 úı men páter bar. Polıtsııa aıyppul salyp, endi birin májbúrli túrde emdeýge jiberip jatyr.
Aqtóbe oblysy aýmaǵynda «Qaýipsiz úı» jedel-profılaktıkalyq is-sharasy ótip jatyr. Polıtsııa ishimdik iship, otbasy men kórshileriniń mazasyn alatyn adamdardy anyqtady.
- Úı aralap tekserý jáne azamattardyń aryz-shaǵymy negizinde 62 mekenjaıdaǵy adamdarǵa shara qabyldandy. Mysaly, Alǵa qalasynyń turǵyny janjal shyǵarǵany úshin 10 táýlikke qamaldy. Sonymen birge maskúnemderdi jınap, ishimdik ishken taǵy eki adam májbúrlep emdeýge jiberildi. Mártók, Hromtaý, Shalqar, Muǵaljar aýdandarynda polıtsııa 20 turǵynǵa baryp, túsindirý jumysyn júrgizdi,- dedi Aqtóbe oblystyq PD baspasóz qyzmeti.
Aqtóbe qalasy Eset batyr turǵyn alabynyń turǵyndary kópqabatty úıge beınebaqylaý kamerasyn ornatyp, baqylaýǵa alýdy surady. Kamera ornatylsa Jedel basqarý ortalyǵyna qosylady.
Aıta keteıik, Pavlodarda balalaryn úıde qamap ustaǵan maskúnem ata-ana anyqtaldy. 3 balany prokýrorlar reıd barysynda anyqtap, qutqarǵan. Olarǵa alǵashqy dárigerlik kómek kórsetilip, áleýmettik qorǵaý organdary baqylaýǵa aldy.
