Aqtóbede maska taqpaı, toptasyp júrgenderge 83 myń teńgeden aıyppul salyndy
AQTÓBE. QazAqparat – Aqtóbe oblysy boıynsha reıd júrgizilip, sanıtarııa talabyn saqtamaǵandarǵa aıyppul salyndy, dep habarlaıdy QazAqparat tilshisi.
Oblystyq taýarlar men kórsetiletin qyzmetter sapasy men qaýipsizdigin baqylaý departamentine 89 ákimshilik materıal tústi. Onyń 11-ine baılanysty 1 mıllıon teńgeden astam aıyppul salyndy. Arasynda kásipkerlermen qatar qarapaıym turǵyndar da bar.
«Top bolyp júrgen, betperdesiz dúkenge, jabyq nysandarǵa kirgen 10 adam men sanıtarlyq-epıdemıologııalyq talapty saqtamaǵan bir kásipkerlerge aıyppul salyndy. Máselen, bir turǵynǵa sýǵa túsýge bolmaıtyny eskertildi. Ol qarsylyq tanytty. Keıin hattama toltyryldy. Reıd jalǵasady. Sondyqtan qaýlyǵa sáıkes erejeni saqtaýdy suraımyz. Jeke tulǵalarǵa - 83 340, kásipkerlerge - 638 940 teńge salynady. Ákimshilik sharamen qatar, bárine eskertý berildi. Tártip mańyzdy», - dedi oblystyq taýarlar men kórsetiletin qyzmetter sapasy men qaýipsizdigin baqylaý departamentiniń basshysy Nursulý Berkimbaeva
Aıta keteıik, Aqtóbe oblysy boıynsha sońǵy táýlikte 13 adam indetke shaldyqty. Onyń ekeýi sımptomsyz. Vırýs juqtyrǵandar arasynda 1 jáne 2 jastaǵy balalar bar. Naýqastardyń bireýi - Oıyl aýdanynan, qalǵany- Aqtóbe qalasynan.
On adam jedel respıratorly vırýstyq ınfektsııa belgilerimen dáriger kómegine júgingen. Bireýi epıdemıologııalyq kórsetkishke baılanysty test tapsyrǵan. Qazirgi ýaqytta patsıentter ınfektsııalyq aýrýhanaǵa jatqyzyldy.
Aıta keteıik, oblysta barlyǵy 2736 adam vırýs juqtyrsa, teń jartysyna jýyǵy emdeldi. Ókinishke qaraı, sońǵy aptada 9 adam koronavırýstan kóz jumdy.
