Aqtóbede mas kúıinde kýálandyrýdan bas tartqan aýdan ákiminiń orynbasary qamaldy
AQTÓBE. KAZINFORM – Aqtóbe oblysy Áıteke bı aýdany ákiminiń orynbasary 15 táýlikke qamaldy. Ol Ákimshilik quqyqbuzýshylyq týraly kodekstiń 613-baby 4-bóligi boıynsha jaýapqa tartyldy.
Aqtóbe oblysy Áıteke bı aýdany ákiminiń orynbasary Erbaqyt Qarjaýbaevqa qatysty is Ákimshilik quqyqbuzýshylyq týraly kodekstiń 613-baby 4-bólimimen, ıaǵnı, «Іshki ister (polıtsııa), kóliktik baqylaý organdary qyzmetkeriniń QR Memlekettik shekarasy arqyly avtokólik quraldaryn ótkizý pýnktterinde jáne Qazaqstan Respýblıkasynyń aýmaǵyndaǵy kóliktik baqylaý beketterinde, áskerı polıtsııa organdary qyzmetkeriniń talaptaryn oryndamaý, alkogoldik, esirtkilik jáne (nemese) ýytqumarlyq masań kúıin kýálandyrýdan ótýden jaltarý» babymen qozǵaldy.
Іs Áıteke bı aýdandyq sotyna 11-naýryz kúni tústi. Otyrys sol kúni saǵat 17:30-ǵa taǵaıyndalǵanymen, E.J.Qarjaýbaev oǵan kelmedi, tipti sot otyrysyn keıinge qaldyrý týraly ótinishhat ta túsirmegen. Sýdıa Oljas Almasbekuly E.Qarjaýbaevty Áıteke bı aýdandyq sotyna kúshtep ákelýge uıǵarym shyǵardy. Qaýlynyń oryndalýy Áıteke bı aýdany polıtsııa bólimine júkteldi. Búgin ákimshilik is qaralyp, qaýly shyqty.
«Erbaqyt Qarjaýbaev QR Ákimshilik quqyqbuzýshylyq týraly kodekstiń 613-baby 4-bóligimen kináli dep tanylsyn. 15 táýlikke qamaýǵa alynsyn jáne 8 jyl merzimge kólik quralyn basqarý quqyǵynan aıyrylsyn. Ákimshilik qamaqqa alý merzimi 2024 jyldyń 13-naýryzy saǵat 18:00-den bastap belgilensin»,- dedi Áıteke bı aýdandyq sotynyń sýdıasy Oljas Almasbekuly.
Sonymen birge sot Áıteke bı aýdandyq polıtsııa bóliminiń bastyǵyna kýágerlerdiń bolmaǵany úshin jeke qaýly shyǵardy.
Al Áıteke bı aýdanynyń ákimdigi bul qyzmetkerdiń 11-naýryz kúni aryz jazyp, jumystan shyqqanyn habarlady.
