Aqtóbede mas kúıinde kólik júrgizgen áıel shuńqyrǵa túsip ketip, birneshe úı gazsyz qaldy
AQTÓBE. KAZINFORM – Aqtóbe qalasy Altyn orda shaǵyn aýdanynda 8 turǵyn úı kesheni gazsyz qaldy. Mas kúıinde kólik júrgizgen áıel shuńqyrǵa túsip ketip, qubyrdy zaqymdaǵan.
Oqıǵa búgin saǵat tańǵy 06:30 shamasynda boldy. Oblystyq PD baspasóz qyzmetiniń jetekshisi Erbolat Sarqulovtyń aıtýynsha, Mercedes markaly avtokóliginiń 39 jastaǵy júrgizýshisi jol qurylysy kezinde qazylǵan shuńqyrǵa túsip ketken.
«Júrgizýshi áıel mas bolǵan. Jol-kólik oqıǵasy kezinde ol zardap shekpedi. Qazirgi kezde hattama toltyrylyp, is sheshim shyǵarý úshin ákimshilik sotqa jiberildi», - dep habarlady oblystyq PD baspasóz qyzmetiniń jetekshisi Erbolat Sarqulov.
Al Aqtóbe qalasy ákiminiń baspasóz qyzmetiniń habarlaýynsha, 8 turǵyn úı, onyń ishinde 560 páter gazsyz otyr. Qazirgi kezde gaz qyzmeti qalpyna keltirý jumystaryn júrgizip jatyr.
Eske salsaq, byltyr aqtóbelik depýtat áıel mas kúıinde kólik júrgizip, 15 táýlikke qamaldy. Ol taıaýda oblystyq qoǵamdyq keńestiń múshesi boldy.
