Aqtóbede mas kúıinde ákimniń kóligin aıdap ketken júrgizýshige úkim shyqty
AQTÓBE. QazAqparat - Aqtóbe oblysy, Alǵa aýdany, Qarabulaq aýylynyń turǵyny mas kúıinde ákimniń kóligin aıtyp ketken. Qylmystyq iske sot úkim shyǵardy, dep habarlaıdy QazAqparat tilshisi.
Qarabulaq aýylynyń 57 jastaǵy turǵyny Talǵat Jumaǵalı Qylmystyq kodekstiń «Kólik quraldaryn basqarý quqyǵynan aıyrylǵan, alkogoldik, esirtkilik jáne ýytqumarlyq masań kúıdegi adamnyń kólik quralyn basqarýy, sol sııaqty kólik quralyn osyndaı adamnyń basqarýyna berý nemese kólik quralyn osyndaı adamnyń basqarýyna jol berý», «Avtomobıldi nemese ózge de kólik quralyn jymqyrý maqsatynsyz quqyqqa syıymsyz ıelenip alý» baptary boıynsha sot alynda jaýap berdi.
Іs materıalyna súıensek, T.Jumaǵalı 14 mamyr kúni saǵat shamamen 12:45-te mas kúıinde óz aýlasynda otyrady. Keıin ol júrgizýshi kýáligi bolmaǵanyna qaramastan Qarabulaq aýyly ákiminiń «Ýaz» kóligin ruqsatsyz aıdap ketedi.
Sot otyrysy kezinde aıyptalýshy T.Jumaǵalı ózine taǵylǵan aıypty tolyq moıyndap, 2018 jyldyń 11 mamyry kúni aýyl ákimi kólikti jóndeýge ákelip tastaǵanyn baıandady. Ol 14 mamyr kúni tańerteń bir bótelke araq iship, ákimniń kóligimen dúkenge barmaq bolady. Aýyldyń Á.Moldaǵulova kóshesimen kele jatqanda ony polıtsııa qyzmetkeri toqtatyp, qujattaryn suraıdy. Polıtsııa qyzmetkerine qujaty joq ekenin, 2016 jyldyń aqpan aıynda júrgizýshi kýáliginen aıyrylǵanyn aıtyp berdi. Sot otyrysy kezinde Qarabulaq aýylynyń ákimi E.Quspanov qyzmettik kóligin aýyl turǵynyna jóndeýge bergenin, bolǵan jaǵdaıdy ýchaskelik ınspektordan bilgenin jetkizdi. Aýyl ákimi kólik jóndeýshi aýyl turǵynyna eshqandaı talap qoımady, azamattyq shaǵym túsirmedi.
«Talǵat Jumaǵalı Qylmystyq kodekstiń «Kólik quraldaryn basqarý quqyǵynan aıyrylǵan, alkogoldik, esirtkilik jáne ýytqumarlyq masań kúıdegi adamnyń kólik quralyn basqarýy, sol sııaqty kólik quralyn osyndaı adamnyń basqarýyna berý nemese kólik quralyn osyndaı adamnyń basqarýyna jol berý», «Avtomobıldi nemese ózge de kólik quralyn jymqyrý maqsatynsyz quqyqqa syıymsyz ıelenip alý» baptary boıynsha aıypty dep tanylyp, oǵan 2 jyl 3 aıǵa bas bostandyǵynan shekteý jazasy taǵaıyndalsyn»,- dedi Alǵa aýdandyń sotynyń sýdıasy G.Ókshebaev.
Sonymen qatar, aıyptalýshy úsh jyl úsh aıǵa kólik júrgizý quqyǵynan aıyryldy.
