Aqtóbede marqum bolǵan balanyń ákesi jaǵdaıdyń qalaı bolǵanyn aıtyp berdi
AQTÓBE. KAZINFORM — Aqtóbede marqum oqýshynyń ákesi ıt sekirgende balanyń qorqyp, júregi jarylyp ketkenin aıtty. Al polıtsııa men bilim basqarmasy naqty sebebin atamady.
Aqtóbe óńirlik kommýnıkatsııalar qyzmetinde polıtsııa, bilim men densaýlyq saqtaý basqarmasy oqıǵanyń mán-jaıyn aıtyp, brıfıng ótkizdi.
— Jedel járdem brıgadasyna qońyraý 07:39–da tústi. 103 brıgadasy 5 mınýtta jetti. Bala úıinde, anasynyń qasynda boldy. Balada klınıkalyq ólim bolǵan. 30 mınýt boıy barlyq reanımatsııalyq is-shara júrgizildi. Alaıda nátıje bolmaı, ólimi tirkeldi, — dedi Aqtóbe oblystyq densaýlyq saqtaý basqarmasynyń bólim basshysy Álııa Sharbaqov.
Aqtóbe oblystyq bilim basqarmasynyń basshysy Bulbul Kúzembaevanyń aıtýynsha, bala 1-synypta oqıdy. Aldyn ala habar taratqan mektep muǵalimi qate aıtqanyn, eshqandaı da ıt bolmaǵanyn jetkizdi. Alaıda balanyń ákesi mán-jaıdy ózi túsindirip berdi.
— It boldy. Ózderi ustap alyp ketti. Qyzyl ıt. Iesi bar ma, joq pa bilmeımiz. Ústine sekirgen, qorqyp ketip, júregi jaryldy. Shyndyq sol. Osy arada kózimizben kórdik. Mamasy artynan shyǵyp kele jatty. Qasynda apasy da boldy, — dedi marqumnyń ákesi.
Eske salsaq, búgin Aqtóbede mektep oqýshysy kóz jumdy.