Aqtóbede mánerlep syrǵanaýdan Qazaqstan kýbogi ótip jatyr
AQTÓBE. QazAqparat - Aqtóbede alǵash ret mánerlep syrǵanaýdan Qazaqstan kýbogi ótip jatyr. Jarysqa 8 komanda qatysady, dep habarlaıdy QazAqparat tilshisi.
Aqtóbede ótken jyly memlekettik-jekeshelik seriktestik aıasynda «Olımp» hokkeı modýli ashylǵan bolatyn. Qazir munda 800-den astam bala short-trek, hokkeı, mánerlep syrǵanaýmen aınalysady. Olardyń arasynda úzdikteri de iriktelip úlgerdi. Búgin elimiz boıynsha 8 komanda baq synasa, sonyń biri Aqtóbe qalasyndaǵy hokkeı modýlinde tárbıelenetin balalar. Komandalar bir apta boıy úzdik óńirdi anyqtaıdy.
«Aqtóbede mánerlep syrǵanaýdan alǵash ret Qazaqstan kýbogi ótip jatyr. Ótken jyly hokkeı modýli iske qosylyp, qysqy sport túrleri boıynsha júzdegen balaǵa jol ashyldy. Olar tańnan keshke deıin osy muz aıdynynda jattyǵa alady. Al kúzde 2 500 oryndy kórermen zaly bar Muz aıdyny paıdalanýǵa beriledi. Jańa sport kesheninde de birneshe respýblıkalyq jarystardy uıymdastyramyz», - Aqtóbe qalasy ákiminiń orynbasary Erbol Nurǵalıev.
Qazaqstan kýbogine Ońtústik Qazaqstan, Mańǵystaý, Almaty, Qaraǵandy oblystary men Astana qalasynan sportshylar qatysyp jatyr.
«Men 7 jasymda mánerlep syrǵanaýǵa qatystym. Alǵashynda jattyqtyrýshylar kásibı sportpen shuǵyldaný úshin 3-4 jastan bastap konkı kııý kerek ekenin aıtty. Biraq qıyndyqtardy eńserip kelemin. El ishinde bolǵan jarystarǵa qatysyp, júldeli oryndardy ıelenip júrmin. Qazir sport sheberimin. Búgingi jarysta Qaraǵandy, Almaty, Ońtústik Qazaqstan komandalarynyń sportshylary biz úshin basty qarsylas bolyp sanalady. Jeńisten úmittimin», - dedi sportshy Mereı Dúısenbek.
Aıta keteıik, jarys 10 aqpan kúni qorytyndylanady.
