Aqtóbede mamyr aıynda 2 qala jáne 11 aýyl ákimi saılanady

AQTÓBE. KAZINFORM – Aqtóbede aýyl ákimine úmitkerlerdiń basym bóligi ózin-ózi usynýshylar. Mamyr aıynda 13 ákim saılanady. Onyń ekeýi qala ákimi. 

Aqtóbe oblysynda mamyr aıynda ótetin saılaýǵa kandıdattardy tirkeý aıaqtaldy. 2 qala jáne 11 aýyldyq okrýgi ákimi úmitkerlerin tirkeý kezinde 45 adam usynyldy. Nátıjesinde 41 kandıdat tirkelgen. Onyń ishinde 9 kandıdat «AMANAT» partııasynan, 1 kandıdat «Aýyl» partııasynan, 31 kandıdat ózin-ózi usynýshy. Bir okrýgke orta eseppen 3 úmitkerden kelip tur.

— Kandıdattardyń orta jasy — 40 jas. Eń jasy 25-te, jasy úlkeni 62-de. Árbir aýyldyq okrýgke bólip qarasaq orta eseppen 3 kandıdattan keledi. Qazirgi ýaqytta kandıdattar úgit-nasıhat jumystaryn júrgizip jatyr, — dedi Aqtóbe oblystyq aýmaqtyq saılaý komıssııasynyń tóraǵasy Nurlybek Júsipov.

Aıta keteıik, úmitkerlerdiń altaýy qazirgi kúni de ákim qyzmetin atqaryp júr.

Buǵan deıin habarlaǵanymyzdaı, 97 paıyzdan astam aýyl ákimderi saılaý arqyly taǵaıyndaldy. Bul týraly Ortalyq kommýnıkatsııalar qyzmetindegi brıfıngte Ulttyq ekonomıka vıtse-mınıstri Baýyrjan Omarbekov aıtty.