Aqtóbede mamandandyrylǵan tuńǵysh ústel tennısi ortalyǵy ashyldy

Aqtóbe oblysynyń ákimi Eraly Toǵjanov elimizdiń batys óńirindegi eń iri mamandandyrylǵan ústel tennısi ortalyǵynyń ashylýyna qatysty. Sharaǵa Ústel tennısi federatsııasynyń ókilderi, ústel tennısinen «AQTOBE CUP» týrnırine kelgen sportshylar qatysty.

Búgin ortalyqta ústel tennısinen «AQTOBE CUP» halyqaralyq týrnıri bastaldy. Oǵan Qazaqstan, Belarýs, Reseı jáne Ózbekstannan 250-den astam sportshy qatysty. Úsh kún boıy erler men áıelder jekeleı jáne juptyq, sondaı-aq 2010 jyly týǵan jáne odan kishi sportshylar jekeleı synda medaldardy sarapqa salady.

«Azamattardyń salaýatty ómir salty – salaýatty ultty qalyptastyrýdyń negizgi sharty. Memleket basshysy Qasym-Jomart Toqaev sportty damytýǵa erekshe kóńil bólýdi, sport ınfraqurylymyn kezeń-kezeńimen salýdy qamtamasyz etýdi tapsyrdy. Bul – strategııalyq mańyzy bar birinshi kezektegi mindet.

Memleket basshysynyń tapsyrmasyn oryndaý aıasynda bıyl oblysta 10 sport nysanynyń qurylysyn aıaqtaý josparlanýda. Óńirde sporttyń 70-ten astam túri boıynsha sportshylardy daıyndaý jumystary jolǵa qoıylǵan. Ústel tennısimen 23 myńǵa jýyq aqtóbelik aınalysady, 1525 sektsııa jumys isteıdi, onyń 709-y – aýyldyq jerlerde», - dep atap ótti Eraly Toǵjanov.

Ortalyqtyń jalpy aýdany 3,8 myń sharshy metrdi quraıdy. Munda 16 tennıs ústeli bar. Kórermen zaly 450 adamǵa shaqtalǵan. Ártúrli jas sanatyndaǵy kásibı sportshylardy daıyndaýǵa jáne halyqaralyq, álemdik deńgeıdegi jarystardy ótkizýge múmkindik beretin ortalyqtyń barlyq korty sertıfıkattalyp, qural-jabdyqtary Eýropadan ákelingen. Osylaısha, Aqtóbe – zamanaýı ústel tennısi ortalyǵy jumys isteıtin respýblıkadaǵy jetinshi qala.

Aqtóbe oblysy ákimi baspasóz qyzmetiniń habarlaýynsha, buqaralyq sportty damytý maqsatynda oblys ákimdigi bıyl 100 jańa tennıs ústeli, 1000 raketka jáne 10 myń dop satyp aldy. Sport qural-jabdyqtary oblys aýdandary men qaladaǵy sport ortalyqtary arasynda bólinip berildi.