Aqtóbede mamandandyrylǵan ákimshilik sot ashyldy
AQTÓBE. QazAqparat – Aqtóbe oblysynyń mamandandyrylǵan aýdanaralyq ákimshilik soty ashyldy, dep habarlaıdy QazAqparat tilshisi.
«Memleket basshysy Qasym-Jomart Toqaev «Halyq únine qulaq asatyn memleket» tujyrymdamasyn júzege asyrý maqsatynda azamattardyń ótinishin zań aıasynda sapaly qaraý máselesin qolǵa alýdy tapsyrǵan bolatyn. Osyǵan oraı zańnama jobasy ázirlendi jáne Qazaqstan Respýblıkasynyń Ákimshilik rásimdik-protsestik Kodeksi qabyldanyp, 2021 jyldyń 1 shildesinen bastap qoldanysqa engizilip otyr. Búginde ótinish bildirý tártibin jeńildetý úshin jáne baqylaýdy jaqsartýǵa arnalǵan «E-Ótinish» aqparattyq júıesi iske qosyldy. Osy júıemen jumys isteý úshin eki aı ishinde jergilikti atqarýshy organdardyń 2439 qyzmetkeri biliktiligin arttyrdy. Ótinish berýshiler úshin qolaıly jaǵdaı jasaý maqsatynda, halyqqa qyzmet kórsetý ortalyqtarynyń bazasynda 16 front keńse jumysyn bastady», - dedi oblys ákimi Ońdasyn Orazalın.
Ákimshilik sot memlekettik qyzmet kórsetýdiń barlyq zamanaýı standartyn eskere otyryp jabdyqtalǵan. Onda aqparat ortalyǵy, kiris keńsesi jáne ózine-ózi qyzmet kórsetý ortalyǵy sııaqty úsh aımaq bar. Sonymen qatar, medıatorlar, advokattar men prokýrorlarǵa arnalǵan jeke kabınetter daıyndalǵan.
