Aqtóbede malshy taýyp alǵan áskerı snarıadty saperlar jaryp jiberdi
AQTÓBE. QazAqparat - Aqtóbeniń Shalqar aýdany Dóńgelekkól jaıylymynda jarylǵysh zat tabyldy. Tot basqan snarıadty saperlar jaryp jiberdi, dep habarlaıdy QazAqparat tilshisi.
Shalqardyń Móńke bı aýyly mańyndaǵy Dóńgelekkól jaıylymynan malshy jarylǵysh zat taýyp aldy. Malshy birden aýyldaǵy ýchaskelik polıtsııaǵa habar berdi. Al polıtsııa qyzmetkeri 30238 áskerı bóliminiń kezekshisine aıtty. «Batys» óńirlik qolbasshylyǵynyń tapsyrmasymen 30238 áskerı bóliminiń jarylǵysh zatty joıý toby aýmaqqa jiberildi.
«Bul daladan tabylǵan alǵashqy jarylǵysh zat emes. 2015 jyldan beri onǵa jýyq jarylǵysh zat tabylyp, joıyldy. Olardyń bárin jergilikti turǵyndar taýyp alady», - dedi 30238 áskerı bóliminiń komandıri Rýslan Ótepov.
Jarylǵysh zat anyqtalǵan aýmaq birden qorshalyp, 85 mıllımetrli snarıadtyń tasymaldaýǵa jaramsyz ekeni anyqtaldy. Sondyqtan tabylǵan jerinde jarý jóninde sheshim qabyldandy.
«Keńes odaǵy kezinde Embi polıgony zertteý jumystaryn júrgizýge, áskerı tehnıka men qarýly kúshti synaýǵa baǵyttaldy. Qazirgi kezde osy aýmaqtan túrli zat tabylyp jatyr. Snarıad ta sol kezeńnen qalǵan bolýy múmkin», - dedi 30238 áskerı bólimi jarylǵysh zatty joıý tobynyń komandıri Aslan Baımaǵambetov.
Áýe qorǵanys kúshteri áskerı ınstıtýtynyń baspasóz qyzmeti kez kelgen jaǵdaıda jarylǵysh zatqa jaqyndaýǵa bolmaıtynyn eskertedi. Eger daladan tabylsa, dereý polıtsııaǵa habar berý qajet. Óz betimen tasymaldaý, metall qabyldaý ornyna tapsyrý qaýipti.
