Aqtóbede malǵa qasqyr shapty

AQTÓBE. KAZINFORM — Aqtóbe oblysy Mártók aýdanynda sharýa qojalyǵyndaǵy malǵa qasqyr shapty.

Úsh bas qoıdy jaryp, 50 shaqty qoı bir-birin taptap tastady.

Sharýa qojalyǵy Mártók aýdany Baınassaı aýyldyq okrýginiń terrıtorııasynda ornalasqanymen, Táńirbergen aýyldyq okrýgine tirkelgen.

— Alǵashynda 100-den astam dep eseptelgen. Biraq áljýaz qoılar tirilip jatyr. Demalystyń aldynda ıesimen kezdestim. Iesi qatty shyǵyn joq ekenin, asyryp tirkep jibergenin moıyndady. 50-60-tan astam qoı jaılap qaıta turyp jatyr dep aıtty. Qoılar áljýaz bolǵan, qulaǵan. Qasqyr boıynsha aqparatty almadym. Buǵan deıin tirkelmegen soń bilmedim. Maldyń ıesi qandaı da bir talap qoımady. Kómektesý jaıyn suraǵany ras. Degenmen mal sharýashylyǵynda saqtandyrý damymaǵan, joq dese de bolady. Tek kezekte.kz bar. Ony endi úıretip jatyrmyz. Bul úlken másele. Sharýa qojalyǵynyń bári tirkele qoımaıdy, — dedi Táńirbergen aýyldyń okrýginiń ákimi Medet Bekjanov.

Aqtóbe oblysy PD baspasóz qyzmetiniń habarlaýynsha, qasqyrdyń 3 bas qoıdy jaryp ketkeni týraly aqparat tirkelgen. Sharýa qojalyǵynyń ıesi qandaı da bir aqparat berýden bas tartty. Ol tek ólgen maldy sanamaǵanyn, mundaı problemalarmen sharýalar ózderi jalǵyz qalǵanyn habarlady.

— Aqparat bergim kelmeıdi. Maǵan odan esh paıda joq. Artyq áńgime kerek emes. Mundaı jaǵdaı birinshi ret bolyp tur ózimde. Biraq aýdannyń birneshe aýylynda «óltirip ketti» dep aıtyp jatady, — dedi ol.

Buǵan deıin habarlaǵanymyzdaı, Atyraý oblysynda sharýa qojalyǵynyń jumysshysyna qasqyr shaýyp, qolyn tistep alǵan. Er adam qolynan jaraqattanǵan.