Aqtóbede maldan ınfektsııalyq aýrý anyqtaldy

AQTÓBE. QazAqparat – Aqtóbe oblysy Alǵa aýdanynda maldan ınfektsııalyq aýrý anyqtaldy. Qazirgi kezde qan synamasy zerthanaǵa jiberilip, rınotraheıt dıagnozy qoıyldy, dep habarlaıdy QazAqparat tilshisi.

Alǵa aýdany Bestamaq aýylynda mal arasynda belgisiz aýrý anyqtalyp, qan synamasy zerthanaǵa jiberildi. Onda iri qara arasyndaǵy ınfektsııalyq aýrý ekeni anyqtaldy.

«Bul aýa arqyly juǵatyn ınfektsııalyq aýrý. Murnynan silekeı aǵady. Qazirgi kezde bári qalypqa keldi. Ólim tirkelmedi. Alǵashynda 7, keıin 35 bas mal aýyrdy. Olardy oqshaýlap, emdedik. Biraq aýsyl emes», - dedi oblystyq veterınarııa basqarmasy basshysynyń orynbasary Isa Bazarov. Onyń aıtýynsha, mal dárigerleri em-shara júrgizip, dezınfektsııalyq jumys jasaǵan.

Aıta keteıik, Bestamaq aýylynda mal aýrýy qazan aıynan bastap tirkelgen. Aýyl turǵyny Qalabaı Kózdibaevtiń aıtýynsha, jaıylymnan oralǵan mal aýyryp, em júrgizilgen. Ázirge karantın jarııalanǵan joq.

«Infektsııalyq rınotraheıt Eset batyr, Bestamaq, Qatpar aýyldarynan bastaldy. Synama qorytyndysy alyndy. Shynymen de ınfektsııalyq rınotraheıt ekeni anyqtaldy. Mal arasynda jıi kezdesetin aýrý. Adamǵa zııany joq», - dedi Alǵa aýdany ákiminiń orynbasary Meıirhan Ermaǵambetov.