Aqtóbede mal ólekselerin kómetin oryn ázirleýge bıyl 686 mln teńge jumsalady

AQTÓBE. KAZINFORM - Oblysta aldaǵy eki jylda veterınarııa salasyna 4 mlrd teńgege jýyq qarjy bólinedi. Árqaısysy 24,5 mln teńge bolatyn mal ólekselerin kómetin 28 orynnyń da qurylysy bıyl júredi.

Aqtóbe oblysynda búginde 2,3 mln bas mal bar. Onyń 600 myńnan astamy múıizdi iri qara bolsa, 422 myńnan astamy jylqy. Al usaq mal sany1,2 mıllıonnan asady. Túıe sany bolsa 24 myńnan kóp. Aldaǵy eki jylda veterınarııa salasynyń materıaldyq-tehnıkalyq bazasyn nyǵaıtý úshin 4 mılrd teńge jumsalady.

- Qarjynyń 3 mlrd teńgeden astamy bıyl ıgeriledi. Oǵan 77 veterınarııalyq pýnkt, 28 mal qorymy jáne úsh aýdanda veterınarııalyq stansa salynady. Qazirgi kezde Qarǵaly, Oıyl, Temirdegi veterınarııalyq stansanyń tozyǵy jetken,- dedi Aqtóbe oblystyq veterınarııa basqarmasynyń basshysy Aıbek Sembaı.

Naqtylasaq úsh modýldik veterınarııalyq stansa salý úshin 90 mln teńge, 77 veterınarlyq pýnktke 2,3 mlrd teńge, al 28 mal qorymyn salýǵa 686 mln teńge jumsalady. Aqtóbe oblysyndaǵy árbir mal qorymynyń quny 24,5 mln teńgege shyǵady. Keler jyly taǵy 29-y salynady. Nátıjesinde oblysta barlyǵy 140 mal qorymy bolady.

Sý tasqynynan keıin óńirdegi aýdandardyń barlyǵyna jyljymaly ınsınerator alyndy. Insınerator maldan juqpaly aýrý anyqtalǵanda ólekseni órteýge yńǵaıly.

- 2025 jyly 3260 bas iri qaradan, 536 jas usaq maldan brýtsellez anyqtalyp, zalalsyzdandyrý jumysy júrgizildi. Sondaı-aq byltyr aýmaqtyq ınspektsııa mamandary maldy qujatsyz tasymaldaǵandardy anyqtady. Barlyǵy 222 jeke jáne zańdy tulǵalaǵa 9 mln teńgege jýyq aıyppul saldy,- dedi Aıbek Sembaı.

Buǵan deıin habarlaǵanymyzdaı, Qyzylordada brýtsellez juqtyrǵan 70-ten astam mal soıyldy. Ótken jyly malǵa tán asa qaýipti 13 túrli juqpaly aýrýǵa qarsy 5979,7 myń doza preparat alyndy.