Aqtóbede maqsatty paıdalanylmaı jatqan jer telimderi memleketke qaıtaryldy
Aqtóbedegi jerdiń paıdalanylýy men qorǵalýyn baqylaý jónindegi basqarma búgin 9 aıdy qorytyndylady. Bıyl 444 myń gektar jer aýmaǵynyń paıdalanylýy tekserildi. Barlyǵy 100-den astam zańbuzýshylyq tirkeldi. Jerdiń paıdalanylýy men qorǵalýyn baqylaý jónindegi basqarma basshysy Ábdihat Myrzalınniń aıtýynsha, 21 quqyq buzýshyǵa 2 mıllıon teńgeden astam aıyppul salynyp, 42 jer paıdalanýshyǵa eskertý berilgen. Aýyl sharýashylyǵy maqsatynda bergen jer telimin paıdalanbaı otyrǵandarǵa taǵy 1 jyl berilip, jerdi ıgerýge múmkindik jasaldy. Talaptar men erejeler týraly eskertýden soń 10 agroqurylym 5 myń gektar jerdi óz erkimen memleketke tapsyrdy.
«Jerdi memleket menshigine májbúrlep qaıtarý úshin 4 agroqurylymǵa qatysty talap aryz ekonomıkalyq sotqa joldandy. Olarda 94 myń ga jer telimi bar. Mártók aýdanyndaǵy «Kazanka» JShS-de 2 myń, «Qarasor - A» JShS-de 7 myń, «Shandy - Agro» JShS-de 7 myń, al Baıǵanın aýdanyndaǵy «Edilbaı - Baıǵanın» JShS-de 78 myń gektarǵa jýyq jerdi qaıtarý týraly aryz sotta qaralyp, qanaǵattandyryldy. Óńirde memleketke qaıtarylǵan jerdi qaıta aınalymǵa berý de másele bolyp tur. Qazir qaıtarylǵan jerdiń 33 myń gektary aınalymǵa engizilgen joq»,- dedi Jerdiń paıdalanylýy men qorǵalýyn baqylaý jónindegi basqarma basshysy Ábdihat Myrzalın.
Aqtóbede kommertsııalyq qurylys nysandary úshin berilgen jerdi ýaqytyly paıdalana almaǵan kompanııalardyń tizimi anyqtaldy. Barlyǵy 3 gektardy quraıtyn 6 jer telimi memleketke keri qaıtaryldy.
«Jerdi zańsyz ıemdenip alatyn sharýalar da kezdesedi. Bıyl 16 quqyqbuzýshylyq anyqtaldy. Olarǵa 2 mıllıon teńgeden astam aıyppul salyndy. Aqtóbeniń Oıyl aýdanynda «KVA OIL Company» JShS tekserilip, 3,11 gektar bolatyn memleket jerin óz betinshe basyp alynǵany anyqtaldy. Jer paıdalanýshyǵa 680 myń teńge aıyppul salyndy»,- dedi Ábdiahat Myrzalın.
