Aqtóbede maqsaryny óńdeıtin zaýyt iske qosylady
AQTÓBE. QazAqparat - Aqtóbede maıdy ekstraktsııalaý zaýyty salynyp jatyr. Qazaqstan-Tájikstan birlesken kásiporny kúzde maıly daqyldardy qabyldaı bastaıdy, dep habarlaıdy QazAqparat tilshisi.
Aqtóbe oblysynyń sharýalary maıly daqyldardy ótkizý máselesin sheshti. Kúzde Hromtaý aýdanynyń Jazyq aýylynda Aqtóbe maıdy ekstraktsııalaý zaýyty paıdalanýǵa beriledi. Munda kúnbaǵys, maqsary, zyǵyr qabyldanady. Buǵan deıin dástúrli emes sharýashylyqpen durys aınalyspaǵan aqtóbelik sharýalar maqsary ósirýdiń qyr-syryn meńgerýdi bastady. Al Tájirıbe stansasynyń mamandary maqsary ósirýdiń artyqshylyǵy men ózine tán qıyndyqtaryn aıtyp berdi.
«Maqsarynyń «ahram» surpy shyǵaryldy. Biz Aqtóbe oblysynyń Mártók aýdanynda egip, mol ónim jınaǵan bolatynbyz. Keıin «Dına» sharýa qojalyǵy 700 keli dán seýip, 22 tonna ónim aldy. Bul maıly daqyldy qýańshylyqta da ósirýge bolady. Elimizdiń ońtústik óńiri sýarmaly ádisti paıdalanyp, ónimdi Qytaıǵa satyp otyr. Ol jaqta maqsarydan tabıǵı taza jıhaz jasalady. Aqtóbege «Nurlan» sortty maqsaryny ósirýge bolady»,- dedi Tájirıbe stansasynyń mamany A. Jubanysheva.
Aıta keteıik, maıly daqyl ósirgenderge memleket sýbsıdııa beredi. Ár tonnasyna 15 myń teńge esepteledi.
«Sońǵy eki jylda maqsary egip júrmiz. Kóbine Qytaı satyp alady. Buǵan deıin ónimdi ótkizý qıyn bolsa, jańa zaýyt máseleni sheshýge kómektesedi. Bastysy -maqsaryǵa qoıylatyn talapty anyqtaý. Máselen, qytaılyqtar maqsary dáni aq bolǵanda alady, al sary bolsa bas tartady»,- dedi sharýa qojalyǵynyń basshysy Ádil Qurmanaev.
Aqtóbeniń Alǵa, Mártók, Hromtaý, Qobda, Muǵaljar aýdandaryndaǵy aýa raıy maqsary ósirýge qolaıly. Zaýyt basshylyǵy sharýa qojalyqtarymen kezdesý kezinde maıly daqyldy egip, tapsyrýdy surady. Zaýyt jylyna 20 myń tonna maqsary qabyldaýǵa daıyn.
«Zaýytta maıly daqyldy saqtaýǵa bolady. Ónim jınaǵan kezde aýa raıyna qaramastan qabyldaý júrgizemiz. Ylǵal, tazartylmaǵan daqyldar qabyldanady. Zaýyt zyǵyr, maqsaryny bir mezette qabyldaı alady. Barlyǵy 90-100 adam jumys isteıdi. Maqsary maıyna suranys joǵary. Qytaı men Orta Azııaǵa eksporttaı alamyz»,- dedi zaýyt quryltaıshysy Negmatýllo Korıdjýmaev.
Sharýalarǵa maqsarynyń iri qara men usaq maldyń jemine paıdaly tustary aıtyldy. Maqsary qosylǵan azyq maldyń tez qoń jınaýyna múmkindik beredi. Úı qustaryna da óte paıdaly.
