Aqtóbede mádenıet úıiniń eks-esepshisi men mamanyna 29 mln teńge jymqyrdy degen aıyp taǵyldy

Aqtóbe qalalyq mádenıet úıiniń burynǵy esepshisi Dana Aıtjanova jáne bólimniń mamany A.D-ǵa qatysty qylmystyq istiń basty sot talqylaýy bastaldy. Prokýror aıyptaý aktisinde oqıǵanyń 2024 jyly qarasha-jeltoqsan aılary men 2025 jyldyń qańtarynda bolǵanyn aıtty.

— Bas esepshi qyzmetin atqarǵan Dana Aıtjanova materıaldyq jaýapty tulǵa bola tura zańsyz paıda tabý maqsatynda birneshe ret quqyqbuzýshylyq jasady. Aqtóbe qalalyq ákimdigi qalalyq mádenıet jáne tilderdi damytý bólimine qarasty mádenıet úıinde esepshi bolǵan Dana Aıtjanova dırektordyń mindetin atqarýshy Naýryzbaevtan ETsQ alyp, qarjylyq jumystardy júrgizý syltaýymen paıda tabýdy kózdeıdi. Bul oıyn mádenıet úıi bóliminiń mamany A.D-ǵa aıtyp, ol usynysty qabyldaıdy. Memlekettik satyp alý konkýrsyn ótkizýge buıryq, tehnıkalyq negizdeme qujattaryn jasap, qyzmettik hattar ázirleıdy. Ekeýi «Jýkataeva A.J», «Han», «Orynbasarova A.J» jeke kásipkerlerin tartady. Jeke kásipker retinde tirkelgen týystary olardyń qylmystyq oıyn bilmegen, — dedi prokýror sotta.

Sottalýshy Dana Aıtjanovaǵa qatysty úsh epızod bar. Birinshisi, «Jańa jylym, jarqyra», «Novyı god — novaıa jızn, novaıa pesnıa» atty mádenı-kópshilik is-sharasyn uıymdastyrý konkýrsy. Memlekettik satyp alý konkýrsynda «Han» jeke kásipkerligi «Jańa jylym, jarylqa!», «Jýkataeva A.J» JK «Novyı god — novaıa jızn, novaıa pesnıa» atty mádenı-kópshilik is-sharasyna jeńimpaz dep tanylady. Biri 9 600 000 teńge, ekinshisi 7 400 000 teńge usynyp, aqsha aýdarylady. Al shyn máninde mádenı is-shara uıymdastyrylmaǵan. Foto, vıdeo dálel ózge kásipker ótkizgen is-sharadan bolyp shyqty.

Prokýror sotta aqshany eki sottalýshynyń óz qajettiligine jumsaǵanyn aıtty. Zańsyzdyq Aqtóbe oblystyq ishki memlekettik aýdıt tekserýi kezinde anyqtaldy.

— 2024 jyly 27 jeltoqsan kúni Qalalyq mádenıet úıi dırektorynyń mindetin atqarýshy Naýryzbaev qyzmetinen ketip, ornyna Nurtas Omarov kelgenimen esepshi qyzmetin atqarǵan Dana Aıtjanova qala ákiminiń shyrshasyn ótkizý konkýrsyn jarııalaıdy. Al ákim shyrshasy 23 jeltoqsan kúni ótip ketken. Soǵan qaramastan Dana Aıtjanova tanysyna habarlasyp, tirkelgen jeke kásipkerligi arqyly konkýrsqa qatysýǵa shaqyrady. Kommertsııalyq usynys daıyndaýdy, somasyn 6 600 000 teńge dep kórsetýdi suraıdy. Túnde konkýrs jarııalanyp, tanysy kommertsııalyq usynysyn júkteıdi, jeńimpaz atanady. Dana Aıtjanova taǵy Naýryzbaevtyń ETsQ qoldanyp, kelisimshartqa qol qoıady. Aqshany «Orynbasarova A.J» JK aýdarady. Keıin is-shara bolmaıtynyn, aqshany qolma-qol ákelýdi suraıdy, — dedi prokýror.

Úshinshi epızodta led ekran men mýzykalyq apparatýraǵa tehnıkalyq qyzmet kórsetý konkýrsy jarııalanǵany aıtyldy. Jeńimpaz atanǵan «Zere» jeke kásipkerligine 3 mln teńge, «Qabyl» JK-ne 2 986 909 teńge aýdarylǵan. Munda da aqshany bankten alyp, qolma-qol berýin suraǵan.

Sot talqylaýynda sottalýshy Dana Aıtjanova ózine taǵylǵan aıypty moıyndamady. Al A.D. óz ustanymyn sottalýshydan jaýap alý kezinde aıtpaq.

Sotta Aqtóbe qalasy mádenıet jáne tilderdi damytý bóliminiń basshysy Gúljaına Bısenǵalıeva kýá boldy. Onyń aıtýynsha, esepshi qyzmetin atqarǵan Dana Aıtjanovaǵa kelisimshart 2025 jyldyń qańtarynan bastap úziletinin habarlaǵanda ol kabınetin qulyptap, sol kezdegi dırektordyń ETsQ bermegen. Qalalyq mádenıet bólimi Aqtóbe oblystyq ekonomıkalyq tergep-tekserý departamentine aryz túsirip, bir jyldy tekserýdi suraǵan. Alaıda 2025 jyly josparly tekserý bolatyny habarlandy.

— Seıfti ashqanda qalalyq mádenıet úıiniń móri, elektrondyq kilti shyqqan joq. Qalalyq mádenıet saraıyna basqa jerden mamandar alyp, mindetin atqarýshy qyzmetkerlerdi taǵaıyndadym. Jańa dırektory Nurtas Omarovqa kilt jasalyp, ol júıege kirgennen keıin aqsha aýdarymdary bolǵanyn anyqtap turmyz, — dedi ol.

Aıta keteıik, Aqtóbede bilim basqarmasy burynǵy úsh esepshini sotqa berdi. Úsheýi de ózderiniń, muǵalimderdiń atyna artyq aqsha aýdaryp, ony óz qajetine jumsap otyrǵan. Oblystyq bilim basqarmasy shyǵyndy óndirip alý úshin sotqa aryz túsirip, jeńip shyqty.