Aqtóbede mádenıet saraıynyń esepshisi eki adamǵa 6 mln teńgege jýyq aqsha aýdarǵan

AQTÓBE. KAZINFORM – Aqtóbe qalalyq mádenıet saraıynyń esepshisi eshqandaı kelisimshart bolmasa da 2 adamǵa mıllıondardy aýdaryp jibergen. Muny oblystyq ishki memlekettik aýdıt departamenti anyqtap, keri qaıtarý týraly nusqama berdi. 

Aqtóbe oblystyq ishki memlekettik aýdıt departamenti qalalyq mádenıet saraıy esepshisiniń jumysyn tekserdi. Tekserý kezinde birneshe zańsyzdyq anyqtaldy.

Qujattarǵa súıensek, mádenıet saraıynda 2 kúzetshi, 2 vahter jumys isteıdi. Soǵan qaramastan byltyr 2 aı boıy ózge kúzet qyzmetin paıdalanyp, olarǵa 500 myń teńgege jýyq aqsha aýdarǵan. Bul – negizsiz shyǵyn. Sonymen birge jalǵan kelisimshart nómirin belgilep, eki adamǵa mıllıondardy jiberdi. 

– Aqtóbe qalalyq mádenıet saraıynyń esepshisi esh negizsiz eki adamǵa aqsha aýdarǵan. Bireýine 2,9 mln, al ekinshisine 3 mln teńge berdi. Olar mádenıet saraıynyń qyzmetkeri, qyzmet kórsetýshi jeke kásipker de emes. Sóıtip kelisimshart bolmasa da negizsiz tólem jasalǵan. Qazirgi kezde jalpy shyǵyn 6 mln teńgege jýyqtaıdy, - dedi Aqtóbe oblystyq ishki memlekettik aýdıt departamentiniń basshysy Sáken Qasymov. 

Aýdıt buzýshylyqtardy qalpyna keltirý týraly nusqama berdi. Arada bir aıdan astam ýaqyt ótse de ázirge aqsha keri qaıtarylmady. Jaýapty qyzmetkerdiń is-áreketine qatysty protsesýaldy sheshim qabyldaý úshin materıaldar quqyq qorǵaý organdaryna berildi. 

Buǵan deıin habarlaǵandaı, Shalqar aýdany ákiminiń orynbasary Bekturǵan Zaırymbet pen turǵyn úı-kommýnaldyq sharýashylyǵy bóliminiń basshysy Altynbaı Berkimbaev 6 jylǵa bas bostandyǵynan aıyryldy. Ekeýi de alǵan aqshasyn keri qaıtarady.