Aqtóbede lokomotıv deposynyń aýmaǵyndaǵy oqıǵadan soń eki jumysshy mert boldy

AQTÓBE. KAZINFORM – Tsehta jóndeý jumystary júrip jatqan. Aýrýhanaǵa jetkizilgen 1989 jáne 2000 jyly týǵan eki jumysshy kóz jumdy. 

Aqtóbe oblystyq TJD baspasóz qyzmetiniń habarlaýynsha, órt mamandar barǵansha sóndirilgen. Sondyqtan TJD qyzmetkerleri oǵan aralaspady. Oqıǵa «Qamqor lokomotıv» JShS-niń aýmaǵynda tirkeldi.

— Zardap shekken adamdar Aqtóbe oblystyq kópsalaly aýrýhanasynyń jansaqtaý bólimine shuǵyl jetkizildi. Aýrýhanaǵa túsken boıda olarǵa barlyq medıtsınalyq kómek berildi. Táýlik boıy baqylaý júrdi. Alaıda olardyń ómirin saqtaý qalý múmkin bolmady. Naýqastar aýyr jaraqattan kóz jumdy, — dep habarlady oblystyq densaýlyq saqtaý basqarmasynyń baspasóz qyzmeti.

Aqtóbe oblystyq eńbek ınspektsııasy basqarmasynyń habarlaýynsha, QR Eńbek kodeksiniń 188-baby 4-tarmaǵyna sáıkes arnaıy tergep-tekserý komıssııasy quryldy. Aldyn ala taraǵan málimet boıynsha, jóndeý jumystary júrgizilip jatqan tsehta jarylys bolyp, órt shyqqan.

— «Qamqor Lokomotıv» JShS-de bolǵan qaıǵyly oqıǵaǵa baılanysty qaza tapqandardyń otbasylaryna qoldaý kórsetý úshin barlyq qajetti sharalar qabyldandy. Jerleý, sadaqasyn ótkizýge qoldaý kórsetildi. Qaza bolǵan azamattardyń atynda bereshektiń bar-joǵyn anyqtaý maqsatynda ekinshi deńgeıli bankterge tıisti suranys joldandy. Fılıal men kompanııa basshylyǵy ujymdyq shart aıasynda qaza tapqandardyń otbasyna materıaldyq kómek kórsetý múmkindigin qarastyryp jatyr. «Qamqor Lokomotıv» JShS qaza tapqandardyń týǵan-týystaryna jáne jaqyndaryna qaıǵyryp, kóńil aıtady, — dep habarlady «Qamqor Lokomotıv» JShS.

Aıtyp óteıik, 1989 jylǵy jumysshynyń artynda 5 balasy qaldy. Al 25 jastaǵy jumysshy úılenbegen.

Eske salsaq, ótken aıda «Bolashaq» shahtasynyń ken óndirý blogynda qysqa merzimdi tutaný boldy. Naýqastar aldymen Aqtóbe, keıin Astanaǵa em alýǵa jiberildi.