Aqtóbede lıftti tekserý jumysy aıaqtaldy
AQTÓBE. QazAqparat - Aqtóbe qalasynda qaıǵyly oqıǵadan keıin lıft tekserý jumysy aıaqtaldy. Barlyǵy 139 kópqabatty úıdegi 282 lıft tekserýden ótti, dep habarlaıdy QazAqparat tilshisi.
Aqtóbe qalasynda lıftte qaıǵyly oqıǵa tirkelip, jergilikti bılik arnaıy komıssııa qurǵan bolatyn. Buǵan deıin habarlaǵanymyzdaı, lıfttegi aqaýdan 28 jastaǵy jýrnalıst Aızat Ábdisamat kóz jumdy. Keıin onyń kúıeýi oqıǵanyń qalaı bolǵanyn baıandap berdi. Bir aıǵa sozylǵan tekserý kezinde 25 jyldan astam ýaqyt jumys istep turǵan 282 lıft baqylaýǵa alyndy. Qazirgi kezde bar bolǵany 18 lıfttiń jyl saıyn tehnıkalyq tekserýden ótip turatyny anyqtalyp otyr. Al 33 lıft kúrdeli jóndeýdi nemese qaıta aýystyrýdy talap etedi.
«Barlyǵy 282 lıft bolsa, onyń 113-inde tehnıkalyq tólqujat joq. Lıftti paıdalaný erejesine saı tekserý bolǵan kezde qatelikter túzetilmese, lıft jóndeıtin mekememen kelisimshart bolmasa, elektromehanık qarastyrylmasa, arnaıy mamandar jumys istemese, baqylaý júrgizilmese lıftti paıdalanýǵa bolmaıdy. Tekserý kezinde tehnıkalyq talaptarǵa saı kelmegen ári jaýapty adamdary belgilenbegeni lıftter anyqtaldy. Barlyǵy 122 turǵyn úıdegi 231 lıftti paıdalaný kezinde zańsyzdyqtan tirkeldi»,- dedi oblystyq energetıka jáne turǵyn úı-kommýnaldyq sharýashylyǵy basqarmasynyń bólim basshysy Samat Lepesov. Tehnıkalyq talapqa saı kelmegen lıftter toqtatylyp, jóndeý júrgizilgen soń ǵana iske qosýǵa ruqsat beriletin boldy.
Eske salsaq, 11 sáýir kúni saraptama komıssııasy lıft tekserýdi bastady. Komıssııa aldymen qujatyn qarap, keıin lıfttiń tehnıkalyq jaǵdaıymen tanysty, qyzmet kórsetetin kompanııaǵa arnaıy mindetter júktedi.
