Aqtóbede lıft shahtasyna qulap ketken jumysshy qutqaryldy
AQTÓBE. KAZINFORM – Aqtóbede salynyp jatqan kópqabatty úıdiń lıft shahtasyna jumysshy qulap ketti. Ol aýrýhanaǵa jetkizildi.
Aqtóbe oblystyq TJD baspasóz qyzmetiniń habarlaýynsha, shaqyrtý túsken jerge jedel-qutqarý jasaǵy jiberildi. Oqıǵa Aqtóbe qalasyndaǵy 12 shaǵyn aýdanda boldy.
- Qutqarýshylar arnaıy zembildiń kómegimen zardap shegýshini ǵımarattan shyǵaryp, jedel járdem qyzmetkerlerine tapsyrdy. Oǵan jedel qutqarý jasaǵynyń qutqarýshylary Nıkolaı Krotov, Ǵalymbek Ábdijamilov, Shyńǵys Muqaev kómektesti, - dep habarlady Aqtóbe oblystyq TJD baspasóz qyzmeti.
Aqtóbe oblystyq densaýlyq saqtaý basqarmasynyń basshysy Nurbol Tympıevtiń aıtýynsha, zardap shekken adam birden kópsalaly oblystyq aýrýhanaǵa jetkizildi. Oǵan mı shaıqalýy, bas jaraqaty dıagnozy qoıyldy. Sonymen birge keýde tusynyń jabyq jaraqatyn alǵan, qoly synǵan.
