Aqtóbede lańkestik qurbandaryn eske alýǵa arnalǵan jarys márege jetti
ASTANA. QazAqparat - Aqtóbe qalasynda búgin ótken jyly 5 maýsymda lańkester qolynan erlikpen qaza tapqan jaýyngerlerdi eske alýǵa arnalǵan áskerı-quqyq qorǵaý qurylymdary arasynda sambodan oblystyq jarys márege jetti, dep habarlaıdy «QazAqparat» tilshisi.
QR Ulttyq ulany «Batys» óńirlik qolbasshylyǵynyń baspasóz qyzmetinen túsken málimetke qaraǵanda, atalmysh týrnırge toǵyz komanda quramynda júzge jýyq palýan qatysyp, jeti salmaq dárejesi boıynsha synǵa tústi.
«Batys» óńirlik qolbasshylyǵyna qarasty 6655-áskerı bóliminiń komandıri, podpolkovnık Erkin Jańabergenovtiń atap ótkenindeı, arystardy eske alýǵa arnalǵan jarys alǵash ret uıymdastyrylyp otyr. Endi ol dástúrli sıpat alatyn bolady.
Jarys qorytyndysynda óz salmaq dárejelerinde Jasulan Bazarbaı (57 kg), Isataı Asqanbaı (62 kg), Aslanbek Sultanov (68 kg), Azatbek Aıbaba (74 kg), Elaman Qoıshybaev (82 kg), Erjan Nyǵmetýllın (90 kg, olardyń bári 6655-áskerı bóliminen), Shyńǵys Shoqpytov (+90 kg, Aqtóbe oblystyq ishki ister departamenti) jeńimpaz atandy.
Jalpykomandalyq esepte alty altyn, bir kúmis medaldi oljalaǵan 6655-áskerı bóliminiń palýandary eshkimge des bermeı, ozyq shyqty. Aqtóbe oblystyq ishki ister departamenti ekinshi, Aqtóbe zań ınstıtýtynyń komandasy úshinshi orynǵa ıe boldy. Jeńimpaz-júldegerler kýbok, gramotalarmen, baǵaly syılyqtarmen marapattaldy.
Eske sala keteıik, ótken jylǵy lańkestik shabýyl kezinde 6655-áskerı bólimnen maıor Danıel Maılybaev, kishi serjant Berikjan Qalıev jáne qatardaǵy jaýynger Dosbol Sapar erlikpen qaza tapqan bolatyn.
