Aqtóbede lańkester shabýyldaǵan áskerı bólim qyzmetkerleriniń analaryna qurmet kórsetildi
Aqtóbedegi terrorıstik akt kezinde qarýly top aldymen «Pallada» qarý jaraq dúkenine shabýyl jasap, keıin ekige bólingen toptyń biri - «Pantera» qarý-jaraq dúkenin basyp alsa, ekinshisi - №6655 áskerı bóliminde atysty. Jeksenbide demalyp jatqan áskerı bólim sol kúni qarý-jaraq qoımasyn aman saqtap qaldy. Aqtóbege kelgen QR Ulttyq ulan Bas qolbasshysynyń orynbasary Muhametqalı Satov áskerı qyzmetkerler jaýyngerlik tapsyrmany tolyq oryndaǵanyn aıtyp otyr.
«Dinı estremızm men terrorızm - búkil álem derti. Bir qaraǵanda Sırııadaǵy jaǵdaıdyń aldyn alýǵa bolatyn edi. Al Qazaqstandaǵy jaǵdaı turaqty, baqylaýda. Degenmen adasqan adamdardyń shabýyly ara-tura tirkelip tur. Bul úshin qoǵam jumys isteýi kerek. 5 maýsymdaǵy lańkestik oqıǵadan soń nátıje shyǵardyq. Áskerı qyzmetkerler jaýyngerlik tapsyrmany oryndady, qarý-jaraq qoımasyn saqtap qaldy. Bir lańkestiń kózi joıylyp, ekeýi aýyr jaralandy. Biraq bizdiń tarapymyzdan da adam shyǵyny boldy. Tipti, syn saǵatta batyl sheshim qabyldaı almaǵan áskerıler de tirkeldi. Olar zań boıynsha jazasyn aldy», - dedi M.Satov.
Aqtóbege arnaıy kelgen QR Ulttyq ulan Bas qolbasshysynyń orynbasary Muhametqalı Satov 5 maýsym kúni erlik tanytqan áskerı qyzmetkerlerdiń analaryna qurmet kórsetti. «Ana degen - qasıetti uǵym. Ol otbasynyń tárbıeshisi, aqylshysy. Sol analardan úlgi-ónege alǵan er azamattar lańkestik oqıǵa kezinde Otan úshin kúresti. Áskerı qyzmetkerler emtıhannan ótkendeı boldy. Búgin biz sol batyr uldarǵa ómir syılaǵan analarǵa qurmet kórsettik», - dedi M.Satov.
Sharaǵa Aqtóbedegi №66/55 áskerı bólimine kelisim shart negizinde eńbek etip júrgen Ǵabıt Baljanov, Rahmet Sáttibaı, Irına Balmaǵambetova men efreıtor Elaman Jandildaev, Jeńis Tabynbaevtyń analary shaqyryldy.
