Aqtóbede qyzmettik kólikterge mekeme ataýy jazyla bastady
AQTÓBE. QazAqparat - Aqtóbede memlekettik mekemege tıesili qyzmettik kólikterdi endi esiginen tanýǵa bolady. QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń oblystyq departamenti qyzmettik mashınalarǵa belgi jabystyrý jumysyn qolǵa aldy, dep habarlaıdy QazAqparat tilshisi.
Aqtóbede qyzmettik kólikti jeke maqsatta paıdalanǵan sheneýnikterdi anyqtaý jumystary júrip jatyr. QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń oblystyq departamenti alǵashqy reıd kezinde 20-ǵa jýyq zańsyzdyqty anyqtap, memlekettik qyzmetkerler tártiptik jazaǵa tartylǵan bolatyn. Qazirgi kezde memlekettik qyzmetshiniń eńbegin asyra paıdalaný, jumys ýaqytynan soń qosymsha júkteme berý tártibi tekserilip jatyr.
«Memlekettik kólikti paıdalaný jóninde turaqty túrde reıd júrgizip otyramyz. Birinshiden, memlekettik kólikti paıdalanǵanda joldama bolýy kerek. Qyzmetkerler keshkilik, túnde de jumys isteýi múmkin. Sondyqtan arnaıy buıryq shyǵarylyp, joldama rásimdeledi. Ekinshiden, memlekettik qyzmetshilerdiń jumys ýaqytyn paıdalanýdy tekserip jatyrmyz. Memlekettik qyzmetshilerdiń jumys ýaqytyn asyra paıdalaný, 2-3 saǵat ustap otyrý durys emes. Tekserý júrip jatyr. Júıeli túrde Eńbek kodeksiniń talaptaryn buzǵan basshylar bolsa, tıisti jaýapkershilikke tartylady»,- dedi QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń oblystyq departamenti basshysy Qaıyrjan Toqyshev.
Aıta keteıik, Aqtóbedegi memlekettik mekeme basshylary qyzmettik avtokólikterge sol mekemeniń ataýyn jazýdy qolǵa aldy. Sebebi, qala ishinde túngi ýaqytta júrgen kólikter aqtóbelikterdiń synyna jıi ushyraıdy. Áleýmettik jeli qoldanýshylary QR «Memlekettik qyzmet týraly» Zańyn alǵa tartyp, kólikti jeke maqsatta paıdalanýshylardy anyqtaýdy suraýda.
