Aqtóbede qyzdy seksýaldyq zorlyqtan qutqarǵan jaýynger marapattaldy

AQTÓBE. QazAqparat – Aqtóbe qalasyndaǵy 6655-áskerı bóliminiń qyzmetkeri, efreıtor Andreı Petrovqa «Quqyq tártibin qamtamasyz etýge qosqan úlesi úshin» medali tabys etildi, dep habarlaıdy QazAqparat tilshisi.

QR Ulttyq ulany «Batys» óńirlik qolbasshylyǵynyń baspasóz qyzmetinen Erbolat Sultanovtyń málim etkenindeı, QR Іshki ister mınıstri, polıtsııa general-leıtenanty Erlan Turǵynbaevtyń atynan tósbelgini 6655-áskerı bólim komandıri, polkovnık Mıras Turdalın tapsyrdy.

Polk komandıri efreıtor A.Petrovqa adam ómirin qutqarýdaǵy batyldyǵy men saýatty is-áreketi, belsendi azamattyq ustanymy úshin alǵysyn bildirdi.

«Aqtóbede qoǵamdyq tártipti qamtamasyz etý úshin polıtsııa qyzmetkerlerimen birge kún saıyn 150-den astam Ulttyq ulan jaýyngeri qala kóshelerine shyǵady. Olar túrli jaǵdaıda batyl sheshim qabyldap, óz mindetterin abyroımen oryndap keledi. Sonyń jarqyn mysalyn Andreı Petrov kórsetti. Qyzmette emes, úıinde júrse de, kómekke shaqyrǵan adamdy qutqara bildi. Biz onyń erligin joǵary baǵalap, úlgi etemiz», dedi M.Turdalın.

«Men bala kúnnen áskerı qyzmetshi bolýdy armandadym. Mektepte sport úıirmelerine qatysyp, erkin kúrespen aınalystym, talaı júlde aldym. Óz áreketimdi erlik dep baǵalamaımyn. Meniń ornymda bolǵan ár azamat osylaı ister edi. Biz nemquraıly bolmasaq qana óz janymyzda júrgen adamdarǵa qolushyn soza alamyz», dedi A.Petrov.

Budan buryn jaýyngerdiń batyl is-qımylyn QR Ulttyq ulanynyń bas qolbasshysy, general-leıtenant Rýslan Jaqsylyqov pen «Batys» óńirlik qolbasshysy, general-maıor Álibek Seralıev baǵalap, alǵyshattar men baǵaly syılyqtar tapsyrǵan bolatyn.

Eske sala keteıik, budan buryn Aqtóbede Ulttyq ulan qyzmetkeriniń qyzdy seksýaldyq zorlyqtan qutqarǵanyn jazǵan bolatynbyz.