Aqtóbede qyzdar stýdentti uryp, telefony men kúrtesin tartyp alǵan
AQTÓBE. QazAqparat – Qyzdardan taıaq jegen Aqtóbedegi S.Báıishev atyndaǵy kolledjdiń úshinshi kýrs stýdenti bir aptaǵa jýyq aýrýhanada em qabyldady. Qazir Qylmystyq kodekstiń «Qorqytyp alý» baby boıynsha tergeý júrip jatyr, dep habarlaıdy QazAqparat tilshisi.
S.Báıishev atyndaǵy kolledjdiń úshinshi kýrs stýdentin qyzdar uryp ketken. Onyń kúrtesi men uıaly telefonyn da tartyp alǵan.
«Aqparat 3 qazan kúni keshkilik bizge jetti. Úshinshi kýrs stýdenti aýrýhanaǵa tústi. Biz ata-anasymen habarlasyp, jaǵdaıyn bilip otyrmyz. Stýdent qyzdyń tártibi, sabaqqa qatysy jaqsy. Qazir quqyq qorǵaý organdary anyqtaý jumysyn júrgizip jatyr. Al kolledjde tárbıe sabaqtary ótýde», - dedi S.Báıishev atyndaǵy joǵary medıtsınalyq kolledj dırektorynyń tárbıe isi jónindegi orynbasary Dınara Imanova-Medeýbaeva.
Polıtsııa bul aqparatty rastap, qylmystyq is qozǵalǵanyn habarlady.
«Polıtsııanyń kezekshi bólimine kelip túsken habarlama boıynsha 17 jasar stýdent qyzdy 4 qyz qorqytyp, kúsh qoldanyp, «Samsung J6» markaly uıaly telefonyn jáne kúrteshesin ashyq túrde tartyp alǵan. Kúdiktiler jábirlenýshige dene jaraqatyn salyp, múliktik shyǵyn keltirgen. Jábirlenýshiden aqsha bopsalaǵan. Kúdiktiler ustalyp, polıtsııa bólimine jetkizildi. Osy derek boıynsha qazirgi kezde Qylmystyq Kodekstiń 194 babynyń 2 bóligi 1 tarmaǵymen sot aldy tergeý amaldary júrgizilip jatyr», - dep habarlady oblystyq PD baspasóz qyzmeti.
