Aqtóbede qyz alyp qashqandar ustaldy
AQTÓBE. QazAqparat - Aqtóbede áleýmettik jeli arqyly tanysyp, qyz alyp qashqandar ustaldy, dep habarlaıdy QazAqparat tilshisi.
Oqıǵa 2 jeltoqsan kúni bolǵan. Polıtsııaǵa belgisiz bireýdiń kámelet jasqa tolmaǵan stýdentti alyp qashqany týraly habarlama tústi. Kolledj stýdenti mingen kólik Aqtóbe - Oral tasjolynda toqtatylyp, eki jas jigit pen joǵalǵan qyz polıtsııa bólimine jetkizildi.
«Qyz áleýmettik jeli arqyly jigitpen tanysady, sóılesedi. Polıtsııa bólimine jetkizilgen stýdent qyz óz erkimen kólikke mingenin, eshkim urlamaǵanyn aıtty. Anasy da esh shara qoldanbaı, kúdiktilerdi bosatýdy surap, aryz jazdy. Biraq ınspektor Dosym Bolatovtyń kúdigi seıilmeı, tergeýdi jalǵastyrdy. Janyna kolledj oqytýshysy men psıhologty ertip, stýdentpen kezdesti. Ashyq áńgime kezinde qyz jigitpen tanysqanyn, kezdesýge inisin ertip shyqqanyn aıtty. Jigit yryqsyz kólikke otyrǵyzyp, alyp qashqan. Sol kezde inisi anasyna habar berip olar polıtsııadan kómek surady. Tergeý kezinde kólik ishinde jigitterdiń kúsh qoldanǵany belgili boldy. Alaıda qyz polıtsııany kórip, qoryqqan. Qyzǵa shyndyqty aıtsań inisi men anasyna zııany tıetinin aıtyp, sendiredi», - dedi oblystyq PD baspasóz qyzmetiniń jetekshisi Erbolat Sarqulov.
Aıta keteıik, kúdiktiler ustalyp, qamaýǵa alyndy. Qylmystyq kodekstiń 122-shi, ıaǵnı, «On alty jasqa tolmaǵan adammen jynystyq qatynas nemese seksýaldyq sıpattaǵy ózge de áreketter jasaý» babymen is qozǵalyp, tergeý bastaldy.
