Aqtóbede Qytaı jáne Italııa ınvestorlaryna qoqys óńdeý zaýytyn salý usynyldy
AQTÓBE. QazAqparat - Aqtóbe ákimdigi Qytaı men Italııa ınvestorlaryna qoqys óńdeý zaýytyn salýdy usyndy, dep habarlaıdy QazAqparat tilshisi.
Aqtóbe qalasyndaǵy qoqys polıgony 10 jyldan astam ýaqyttan beri paıdalanylyp keledi. Qazir aýmaǵy 60 gektar bolatyn polıgonnyń basym bóligi tolyp qalǵan. Taıaýda órt shyǵyp, ony sóndirýge eki kún boıy 30-dan astam tehnıka jumyldyryldy. Aqtóbe oblysy ákiminiń orynbasary Qaırat Bekenovtiń aıtýynsha, aldaǵy ýaqytta polıgon aýmaǵynda kúzet kúsheıip, bógde adamnyń terrıtorııaǵa kirip ketpeýi qadaǵalanatyn bolady.
«Aqtóbe qalasynyń qoqys polıgony 2023 jylǵa deıin jaramdy. Aldaǵy ýaqytta polıgonǵa qoqys óńdeý zaýytyn salý josparda bar. Qaladan shyqqan qoqys tek suryptalsa, endi Qytaı men Italııa ınvestorlarynyń usynysyn qarap jatyrmyz. Olar qaldyqty tolyq óńdeý jobasyn usyndy. Tipti, elektr qýatyn óndirýge bolady eken»,- deıdi Aqtóbe qalalyq turǵyn úı-kommýnaldyq sharýashylyq bólimi basshysynyń mindetin atqarýshy Ybyraı Kúzbaev.
Aıta keteıik, jergilikti ákimdik ınvestorlarǵa qoqysty shyǵarý jobasyn qosa usynǵan. Buǵan deıin habarlaǵanymyzdaı, qala aýmaǵy 10 terrıtorııaǵa bólinip, árqaısysyna jańa kompanııa bekitilgenimen, turmystyq qatty qaldyqty shyǵarý máselesi sheshimin tappady.
