Aqtóbede qymbat velosıpedter urlanyp jatyr
AQTÓBE. QazAqparat - Aqtóbede baǵasy 100 myń teńgeden astatyn velosıpedter urlanyp jatyr. Urlyqshylardyń kóbi buryn sottalǵandar, dep habarlaıdy QazAqparat.
Aqtóbe qalasynda bir aı ishinde 73 velosıped urlandy. Qala turǵyndary qymbat «kólikterin» kópqabatty turǵyn úıdiń kreberisine jáne aýlaǵa tastap ketedi. Osy sátti urymtal paıdalanǵan urylar velosıpedti alyp, ony bazar men taksı turaqtarynda satady. « Jaz bastalǵaly velosıped urlandy dep jazylǵan aryz kóbeıdi. Velosıpedtiń 26-sy kreberiste, 11-i úıdiń aýlasynda qoldy bolǵan. Velosıped satyp alýshylar onyń pasportyn alýy kerek. Sol jerde nómiri jazýly bolady. Bul nómir joǵalǵan zatty izdeý kezinde kóp kómektesedi. Serııalyq nómir ramanyń tómengi jaǵynda ornalasqan. Taǵy bir eskeretin jaıt, shynjyrly qulyp urlyqshylarǵa kedergi emes. Olar metall bekitkishti úzip, qıyp alyp keted»,- dedi qalalyq ІІB krımınaldyq polıtsııa bóliminiń bastyǵy Serikjan Dúzbaev.
Aıta keteıik, qalalyq ishki ister basqarmasy urlanǵan velosıpedtiń 26-syn tapqan. Olar aryzdanýshylardyń ótinishimen kez kelgen ýaqytta qala kóshelerindegi velosıpedti teksere alady. Krımınaldyq polıtsııa bólimi bastyǵynyń aıtýynsha, urlanǵan velosıpedter taksı turaqtary men bazarlarda qaıta satylady. Urlyqshylardyń kóbi buryn sottalǵandar. Kúdiktiler ustaldy. Olardyń kinási tolyq dáleldense, Qylmystyq kodekstiń «Urlyq» baby boıynsha 2 jylǵa deıin bas bostandyqtarynan aıyrylýy múmkin.
