Aqtóbede qymbat kólikter kortejin bastap júrgen polıtsııa qyzmetkerleri kóptiń ashýyna tıdi
AQTÓBE. QazAqparat - Aqtóbe oblysy Shalqar aýdanynyń bıylǵy mektep túlekteri bitirý keshin erekshe úlgide ótkizdi. Olar qymbat kólikter minip, aýdan ishin dabylmen júrip ótken, dep habarlaıdy QazAqparat tilshisi.
Aqtóbeniń Shalqar aýdanyndaǵy mektep túlekteri bir kúnde búkil óńirdi shýlatty. Polıtsııanyń qyzmettik kóligi bastaǵan kortej aýdan kóshelerimen júrip ótip, qarama-qarsy kezdesken barlyq kóliktiń jol jıegine toqtaýyna májbúr etken. Áleýmettik jelini shýlatqan bul vıdeo kóptiń ashýyna tıdi.
«Aýdanda «Jas túlik-2017» festıvali uıymdastyryldy. Osy festıvaldiń stsenarııi boıynsha ata-analardyń ótinishimen «Altyn belgi» ıegerlerine qurmet kórsetý maqsatynda kásipkerlerdiń jeke avtokólikterin alyp, Shalqar qalasynyń kórikti jerlerin aralatyp, fotosessııa jasaldy. Mektep túlekteriniń ómir qaýipsizdigin qamtamasyz etý maqsatynda arnaıy qyzmettik kólikpen bastap júrý jóninde aýdan ákimi men aýdandyq ishki ister bólimine hat joldanyp, qoldaý tapty», - dedi Shalqar aýdandyq bilim bóliminiń basshysy Amangeldi Qonaqbaev. Kortejdegi lımýzın de jergilikti kásipkerdiki. Kortejde barlyǵy 10-ǵa jýyq kólik bolǵan. Bárin kásipkerler tegin bergen.
Aıta keteıik, aýdanda 46 oqýshy «Altyn belgi» ıegeri atanyp, 36 túlek úzdik attestat aldy. Barlyǵy 492 oqýshy mektep bitirgen.
Osy oqıǵaǵa baılanysty oblystyq ІІD-niń baspasóz qyzmeti túsinikteme berdi. Baspasóz qyzmetiniń habarlaýynsha, Shalqar aýdandyq ákimdiginen arnaıy hat kelgen soń túlekterdiń qaýipsizdigin qamtamasyz etý úshin ýchaskelik polıtsııa qyzmetkerleri kortejdi bastap júrgen.
«Barlyǵy alty kólik Shalqar aýdanynyń Eset Kókiuly kóshesinen U.Baqtybaı kóshesine deıin, odan ári Shalqar aýdandyq ákimdigi ǵımaratynan M.Shymanulynyń eskertkishine deıin, Aıshýyq kóshesinen №8 orta mektepke barǵan»,- dedi oblystyq ІІD baspasóz qyzmeti.
