Aqtóbede qymbat kólikpen kósheni aralaǵan mektep túlekteri UBT-da eń tómen nátıje kórsetti
AQTÓBE. QazAqpart - Aqtóbe oblysy Shalqar aýdanynyń «Altyn belgi» ıegerleri qymbat aq kólikke minip, qala ishin dabylmen aralap shyqqan bolatyn. Eldiń synyna ilikken túlekter UBT kezinde oblys boıynsha eń tómen ball jınady, dep habarlaıdy QazAqparat tilshisi.
Aqtóbe oblysy Shalqar aýdanynda bıyl 46 mektep túlegi «Altyn belgi» aldy. Ana-analardyń uıymdastyrýymen, aýdan ákimdigi, bilim bóliminiń qoldaýymen túlekter aq tústi sheteldik kólikke minip, qalanyń birneshe jerin aralap, kóshede dabylmen júrip ótken bolatyn. Túlekterdi sol kúni jol-patrýldik polıtsııasy bastap júrdi. Bul kórinis áleýmettik jeli qoldanýshylarynyń ashýyn keltirgeni belgili.
Al 21-24 maýsym kúnderi aralyǵanda Aqtóbe oblysynyń 15 beketinde UBT ótti. Onyń 13-i aýdanda, ózgesi oblys ortalyǵynda. Belgili bolǵany, ótkizý pýnktterinde 47 metall izdegish qural boldy. Barlyǵy 150-den astam beınekamera aýdıtorııalardaǵy tártipti baqylady. Uıaly telefon baılanysyn óshiretin 90 qural test kezinde iske qosyldy. Eń tómen kórsetkish - Shalqar aýdanynda.
«Aqtóbe oblysynyń túlekteri UBT kezinde 82,4 ball jınady. Oıyl, Alǵa, Muǵaljar aýdandary joǵary nátıjege qol jetkizdi. Al Temir, Yrǵyz aýdandarynyń kórsetkishi tómen. Aýdandar boıynsha Shalqar aýdany 72,1 kórsetkishimen tizim sońynda tur», - dep habarlady oblystyq bilim basqarmasynyń baspasóz qyzmeti.
Shalqar aýdandyq bilim bóliminiń bas mamany Jansáýle Beketovanyń aıtýynsha, aýdanda barlyǵy 324 túlek UBT tapsyrǵan. «Altyn belgi» ıegerleriniń bári shekti 50 baldy jınaǵanymen, olardyń arasynda memlekettik granttan kúder úzgender de bar.
Aıta keteıik, oblysta úsh túlek eń joǵary 136 ball jınady. Olar M.Qusaıynov atyndaǵy daryndy balalar mektep-ınternatynyń, №23 mektep-lıtseıiniń jáne Hromtaý aýdandyq №4 orta mektebiniń túlegi. Aqtóbe respýblıka boıynsha bıyl 4 orynda tur.
