Aqtóbede qylmystyq top ustaldy
AQTÓBE. QazAqparat - Aqtóbede uzaq ýaqyt boıy jalǵan shot-faktýra jazýmen aınalysqan qylmystyq top quryqtaldy, dep habarlaıdy QazAqparat Qarjy monıtorıngi komıteti baspasóz qyzmetine silteme jasap.
Komıtettiń Aqtóbe oblysy boıynsha ekonomıkalyq tergeý basqarmasy «STOP-Obnal» jedel profılaktıkalyq sharalar sheńberinde uzaq ýaqyt boıy naqty jumys jasamaı, qyzmet kórsetpeı jáne taýarlardy jóneltpeı jalǵan shot-faktýra jazýmen aınalysqan qylmystyq toptyń jolyn kesti.
«Kúdiktiniń dostary men týystary atyna tirkelip, basqa da seriktestikterge qyzmet kórsetildi nemese taýar jetkizildi degen derekpen 15 kásiporyndy tirkeýge/qaıta tirkeýge qala turǵynynyń qatysqany anyqtaldy. Zańsyz áreketterdiń nátıjesinde memleketke tólenbegen salyq men bıýdjet tólemder túrinde 3,5 mıllıard teńgeden astam kólemde asa iri zalal keltirgen», delingen habarlamada.
Qylmystyq kodekstiń QK 216-baby 3-bólimi boıynsha tergeý amaldary júrgizilip, qazirgi tańda qylmystyq is sotqa joldandy.
