Aqtóbede qylmys azaıdy
AQTÓBE. QazAqparat - Aqtóbe oblysynda qylmys 35,5 paıyzǵa azaıdy. Bul bıylǵy jyldyń birinshi toqsanyndaǵy kórsetkish, dep habarlaıdy QazAqparat tilshisi.
Jyl basynan beri Aqtóbede 4 myńǵa jýyq qylmys tirkelgen. Ótken jyldyń birinshi toqsanynda kórsetkish 6 myńnan astyp ketken edi. Tártip saqshylary qoǵamdyq oryndarda, kópshilik jınalatyn jerlerde quqyqbuzýshylyq tómendegenin aıtyp otyr. Urlyq, tonaý, alaıaqtyq ta azaıdy.
«Urlyq, páter tonaý deregi tórt esege azaıyp, ortasha aýyr qylmys úsh esege tómendedi. Qazir óńirde qaraqshylyq, múlik tonaý azaıyp keledi. Kólik pen uıaly telefon urlyǵy da báseńdedi. Qoǵamdyq kólikterde qalta qarap, adamdardyń baǵaly zattary men aqshasyn alyp ketetin adamdardyń fotosy jarııalanyp, ilindi. Jolaýshylardyń saq bolýyna bul da óz áserin tıgizdi. Sonymen qatar, «Halyq qaýipsizdigin qamtamasyz etý» aldyn-alý sharasynyń paıdasy mol»,- dep habarlady oblystyq ІІD baspasóz qyzmeti.
Aıta keteıik, «Halyq qaýipsizdigin qamtamasyz etý» sharasyn ótken jyly Bas prokýratýra bastap berdi. Sol kezde óńirde 200-den astam maman kelip, túsindirý jumystaryn júrgizdi. Bıyl jergilikti mamandar aldyn-alý, memlekettik baǵdarlamalardy túsindirý, kásipkerlik negizderi týraly semınar ótkizý, qylmystyq quqyq buzýshylyqty joıý jumystaryn jalǵastyryp jatyr.
