Aqtóbede qujatsyz kólik júrgizgen jasóspirim ustaldy
AQTÓBE. QazAqparat – Kámelet jasqa tolmaǵan aqtóbelikter kólik aıdap, ustaldy, dep habarlaıdy QazAqparat tilshisi.
Birinshi oqıǵa 6 tamyz kúni saǵat 21:30-de tirkeldi. Qobda aýdandyq polıtsııa bóliminiń patrýlik polıtsııa toby Qobda aýylyndaǵy Ábilqaıyr han kóshesinde VAZ-2114 kóligin toqtatqan. Kólik júrgizýshisi men úsh jolaýshynyń eshqandaı qujaty bolmady. Tekserý barysynda rýlde otyrǵan balanyń kámeletke tolmaǵany, tipti Shalqar qalasynyń turǵyny ekeni anyqtaldy. Júrgizýshi kýáligi, saqtandyrý qujaty da joq.
«Zańdy ókilderi janynda bolmaı, olar oblystyq «Aıala» balalardy qoldaý ortalyǵyna ornalastyryldy. Al kólik Qobda aýdandyq polıtsııa bóliminiń aıyp turaǵyna qoıyldy. Osy derek boıynsha Ákimshilik quqyqbuzýshylyq týraly kodekstiń «Qujattary joq jáne basqarý quqyǵy joq adamnyń kólik quralyn basqarý» baby boıynsha jaýapqa tartý kózdelgen. Sonymen birge taǵy bir oqıǵa 8 tamyz kúni tirkeldi. Samara-Shymkent tasjolynda polıtsııa qyzmetkerleri VAZ-2114 kóligin toqtatty. Munda da kámeletke tolmaǵan bala rýlge otyrǵan. Ol jol-qozǵalysy erejesin buzyp, qarsy baǵytqa shyǵyp ketken. Ákimshilik quqyqbuzýshylyq týraly kodekstiń «Kólik quralyn joldyń júrý bóliginde ornalastyrý, qarsy júrip ótý nemese basyp ozý qaǵıdalaryn buzý» baby boıynsha jaýapqa tartý kózdelgen»,- dedi oblystyq PD baspasóz qyzmetiniń jetekshisi Erbolat Sarqulov.
