Aqtóbede «qutyrǵan» mysyq tistegen adam em qabyldap jatyr
AQTÓBE. QazAqparat - Aqtóbede mysyq qutyrma aýrýyna shaldyǵyp, ıesi Bolat Joldybaevty tistep alǵan. Qazirgi ýaqytta mysyq óltirilip, ıesiniń densaýlyǵy baqylaýǵa alyndy, dep habarlaıdy QazAqparat tilshisi.
Aqtóbe oblysy, Qyzyljar aýyldyq okrýginde kútpegen jaǵdaı tirkeldi. Buǵan deıin habarlaǵanymyzdaı, eki kóshege shekteý qoıylǵan bolatyn.Qazirgi kezde barlyq malǵa, ıt pen mysyqqa vaktsına egilip jatyr.
«Qańtar aıynyń basynda Bolat Joldybaevty óziniń mysyǵy tistep alǵan. Qurylys aýylyndaǵy jaǵdaıǵa baılanysty veterınarlar mysyqty alyp, saraptama jasady. Tekserý kezinde qutyrma derti anyqtaldy. Keıin aýylda shekteý qoıylyp, bul eki kósheni qamtydy. Qazirgi kezde Bolat Joldybaevtyń eki ıti, iri qara malyna vaktsına berildi. Aldaǵy ýaqytta eki kóshede turatyn adamdardyń barlyq malyna vaktsına egiledi. Tipti, mysyq pen ıtke de ekpe jasalady»,- dedi Aqtóbe oblystyq veterınarııa basqarmasynyń bas mamany Gúlsara Kelebaeva.
Aıta keteıik, shekteý sharasy kezinde maldy qoradan shyǵarýǵa bolmaıdy. Itti de baılap ustaý kerek. Zalalsyzdandyrý jumystary júrip jatyr.
