Aqtóbede qutqarýshylarǵa arnalǵan eskertkish boı kóterdi
AQTÓBE. QazAqparat - «Halyq jáne bıznes qaýipsizdigi» forýmy aıasynda búgin qutqarýshylarǵa arnalǵan eskertkish ashyldy, dep habarlaıdy QazAqparat tilshisi.
Forým aıasynda sý tasqynynyń aldyn alý, zilzala qaýip-qaterin azaıtý, turǵyn úı men avtokólikti órtten saqtandyrý, kásiporyndarda órt qaýipsizdigin uıymdastyrý, balabaqsha, mektep balalaryna qaýipsizdik erejesin úıretý jaıy jan-jaqty talqylandy. Al búgin «Halyq jáne bıznes qaýipsizdigi» atty respýblıkalyq sharasy kezinde órt sóndirý qyzmetine 8 kólik berildi. Keıin qutqarýshylar skverindegi «Táýelsiz qazaq eliniń qutqarýshylaryna» eskertkishi saltanatty túrde ashyldy.
«Eskertkish tótenshe jaǵdaıda birinshi bolyp kómekke umtylatyn, adam ómirin saqtaýǵa bar-kúsh jigerin sarp etetin erjúrek ári batyl mamandarǵa arnalǵan. Eskertkishtiń jalpy bıiktigi - 4,7 metr. Al balany órtten aman alyp qalyp, ony kóterip kele jatqan qutqarýshynyń músini 2,5 metr bıiktikpen ornatylǵan. Eskertkish taqtaǵa «Táýelsiz qazaq eliniń qutqarýshylaryna taǵzym» dep jazyldy. Aqtóbe oblysy azamattyq qorǵaý ardagerler keńesiniń bastamasymen metsenattardyń demeýshilik qarjysyna ornatyldy», - dep habarlady oblystyq TJD baspasóz qyzmeti.
