Aqtóbede kúshtep emdeý ornyna maskúnemder syımaı jatyr

AQTÓBE. QazAqparat - Aqtóbe oblystyq jergilikti polıtsııa qyzmeti maskúnemderdi kúshtep emdeý mekemesindegi oryn sanyn arttyrýdy surady. Іshimdikke áýes adamdar mekemege syımaı jatyr, dep habarlaıdy QazAqparat tilshisi.

Aqtóbe oblystyq jergilikti polıtsııa qyzmeti depýtattar aldynda esep berip, birqatar problemalardyń sheshimin surady. Birinshiden, maskúnemderdi kúshtep emdeý mekemesi tolyq, adam qabyldamaıdy.

«Іshimdik ishetinderdiń keıbiri otbasy músheleri úshin qaýipti. Sondyqtan olardy tez arada emdeý ornyna jatqyzý kerek. Ótken jyldyń basynda eki aı boıy maskúnemder qabyldanbady. Sebebi, mekeme ishi tolyp qalǵan, oryn joq. Bıyl da jyl basynda osy kórinis qaıtalandy»,- dedi Aqtóbe oblystyq jergilikti polıtsııa qyzmetiniń bastyǵy Qanat Álıev.

Ekinshiden, Aqtóbede turmystyq jaǵdaıda bolǵan qylmys sany 64 paıyzǵa ósti. Turmystyq jaǵdaıda zardap shekkenderdi qabyldaıtyn daǵdarys ortalyǵy memlekettik-jekemenshik seriktestik negizinde ótken jyly ashylǵanymen, áli kúnge deıin áıelder men balalardy qabyldamaı tur.

Úshinshiden, óńirde qylmystyń izin sýytpaı ashý kórsetkishi tómen.

«Ótken jyly 1300-den astam qylmys ashyldy. Kóbi urlyq, tonaý, buzaqylyq. Bul az. Oǵan ózindik sebebi bar. Máselen, jergilikti polıtsııa qyzmetkerleri kópshilik sharalarda qoǵamdyq tártipti kúzetedi. Ótken jyly apta saıyn saıabaqta mádenı-sporttyq sharalar ótkizildi. Sonymen qatar, jol-patrýldik polıtsııasy únemi resmı delegatsııa kelgende, balalardy, janǵysh zattardy tasymaldaǵanda tótenshe jaǵdaıdyń aldyn alý úshin joldardy jaýyp, kómek kórsetedi. Munyń bári ýaqyt pen eńbek»,- dedi Qanat Álıev.