Aqtóbede áseri kúshti dárilerdi zańsyz ótkizgen qylmystyq top ustaldy
ASTANA. KAZINFORM — Aqtóbe oblysynda áseri kúshti zattardy zańsyz ótkizýmen aınalysqan uıymdasqan qylmystyq toptyń joly kesildi.
ІІM málimetinshe, 2026 jyldyń 1 qańtarynan bastap áseri kúshti zattardyń zańsyz aınalymy úshin qylmystyq jaýapkershilik engizilgen.
Jedel-tergeý is-sharalary barysynda Almatydaǵy dárihanalardyń birinde jumys isteıtin farmatsevt óziniń qyzmettik múmkindikterin paıdalanyp, kúshti áser etetin zattardyń iri kólemdegi partııalaryn Aqtóbe oblysyna jetkizýdi uıymdastyrǵany anyqtalǵan.
Operatsııa nátıjesinde qylmystyq toptyń barlyq múshesi ustaldy. Olardyń arasynda uıymdastyrýshy, operator, oraýshylar jáne zattardy jasyrýmen aınalysqan kúdiktiler bar.
Zańsyz aınalymnan myńnan astam dárilik preparat tárkilendi.
— Kúshti áser etetin zattardyń zańsyz aınalymy úshin 15 jylǵa deıin bas bostandyǵynan aıyrý jazasy qarastyrylǵan, — dedi ІІM Esirtki qylmysyna qarsy is-qımyl komıtetiniń aǵa jedel ýákili Úmitbek Farhadov.
Eske salaıyq, buǵan deıin elimizde qaýipti dáriler endi sot sheshimin kútpeı satylymnan alynatynyn habarlaǵanbyz.
