Aqtóbede qus eti men kókónis jetispeıdi
AQTÓBE. QazAqparat -Aqtóbe oblysynda óńiraralyq kooperatsııany damytý jumysy qolǵa alyndy. Degenmen, óńirde shyǵarylatyn qus eti men kókónis ishki suranysty tolyq qamtamasyz ete almaı otyr, dep habarlaıdy QazAqparat tilshisi.
Aqtóbe oblysynda óńiraralyq kooperatsııany damytý jumysy júrgizilip jatyr. Qazirgi aınalym 5 mıllıard teńgeni qurady. Aqtóbe oblysy Jambyl, Qyzylorda oblystarymen jáne Almaty qalasymen baılanys ornatyp, birneshe memorandýmdarǵa qol qoıylǵan bolatyn. Nátıjesinde ońtústik óńirden kókónister deldalsyz jetkizilip jatyr.
«Ótken jyly Aqtóbe oblysynan basqa óńirlerge jalpy somasy 16,4 mıllıard teńgeni quraıtyn 47 myń tonna aýyl sharýashylyǵy ónimderi jáne 24,1 myń bas mal jiberildi. 2018 jyldyń 1 qańtaryndaǵy jaǵdaı boıynsha basqa óńirlerden jalpy quny 10,4 mlrd. teńgeni quraıtyn 28,3 myń tonna azyq-túlik ónimderi jáne 6 myńnan astam mal basy jetkizildi» - dedi Aqtóbe oblysynyń aýyl sharýashylyǵy basqarmasynyń basshysy Sársembaı Qusaıyn.
Qazirgi kezde Aqtóbede shyǵarylatyn ónimdi Reseıdiń birneshe qalasyna jetkizý úshin kelissózder júrgizilýde. Aldaǵy ýaqytta jergilikti ónim Orynbor, Orsk qalalaryna jóneltiledi.
«Búgingi tańda biz ózimizdi qus etimen qamtamasyz ete almaı otyrmyz. Sondyqtan da ónimdiligi 10 myń tonna bolatyn qus fabrıkasynyń qurylysy bul qajettilikti sheshetin bolady. Óńirdi qyzanaqpen jáne qııarmen tolyq qamtamasyz etý qajet. Aldaǵy ýaqytta aýmaǵy 43 gektar bolatyn jańa jylyjaı salynsa, bul másele de sheshiledi»,- dedi Q. Sársembaı.
