Aqtóbede qurylysy aıaqtalmaǵan úıge ınvestorlar izdestirilýde
AQTÓBE. QazAqparat - «Qazaqstannyń TÚKSh damytý jáne jańǵyrtý ortalyǵy» AQ-y 2013 jyly sý, jaryq, jylý únemdeıtin «aqyldy úıdiń» qurylysyn bastap, aıaqtaı almady. Bıyl 5 jyl boıy qurylysy aıaqtalmaǵan ınnovatsııalyq jobany oblys ákimdigi óz mindetine aldy, dep habarlaıdy QazAqparat tilshisi.
Aqtóbedegi «saqaldy qurylystar» arasynda «Qazaqstannyń TÚKSh damytý jáne jańǵyrtý ortalyǵy» AQ-nyń ınnovatsııalyq jobasy bar. «Nur Aqtóbe» yqsham aýdanyna jaqyn ornalasqan aqyldy úı úsh qabattan turady. Jylý, sý, jaryq únemdeıtin, qýatty kún men jelden alatyn aqyldy úı barlyq turǵyn úı-kommýnadyq sharýashylyq mekemelerine úlgi bolýy tıis edi. Páter ıeleri kooperatıvi men kondomınıým ıelerin shaqyryp, tájirıbe almasýǵa arnalǵan alań qurylysy 2013 jyly bastalyp, sol jyly iske qosylýy tıis bolatyn. Ári EKSPO halyqaralyq kórmesi kezinde jel men kúnnen qýat alatyn jobany kelýshilerge kórsetý jospary qoıyldy. Mundaı joba bir mezgilde Astana men Almaty qalalarynda da júrdi. Degenmen arada 5 jyl ótkenimen Aqtóbedegi qurylys aıaqtalmaı, nysan qaraýsyz qaldy.
«Joba avtory - «MAG» AQ. Respýblıkalyq qarjyǵa salynǵan qurylysqa Qurylys jónindegi komıtet tapsyrys bergen bolatyn. Biraq qurylys birneshe jyldan beri toqtap tur. Oblys ákimi Berdibek Saparbaevtyń aralasýymen bıyl qurylysty oblys ákimdigine berdi. Jospar boıynsha qurylys bıyl aıaqtalýy tıis. Qazir qurylysty «Rýstal» JShS júrgizip jatyr», - dedi Aqtóbe oblysynyń memlekettik sáýlet-qurylys baqylaý basqarmasynyń basshysy Berdııar Pirimbetov.
Aıta keteıik, bıyl qurylysy uzaqqa sozylǵan bir nysan buzylyp, bireýi qaıta jańardy. Qazirgi kezde 8 nysanda qurylys jumystary qaıta jandandy.
«Aqtóbe qalasy boıynsha «Kosmos» qonaq úıi men «Jibek joly» turǵyn úı kesheniniń 5 qabatty 6 úıin salý úshin ınvestorlar izdep jatyrmyz»,- dedi Berdııar Pirimbetov.
